A Feira Expomar 2019 celebrarase do 9 ao 12 de maio. A Fundación nomeará proximamente aos novos secretario e xerente, tras a marcha de Patricia Otero e Catalina Sánchez

Burela, 5 de novembro de 2018. A Feira Náutico Pesqueira Expomar 2019 celebrarase do 9 ao 12 de maio, tal e como se acordou na xuntanza mantida hoxe por parte do padroado da Fundación Expomar. A persoa que asuma a Concellería de Mar, tras a saída de Patricia Otero do goberno municipal, será a nova secretaria da devandita Fundación. Ademais nos vindeiros días, tamén se procederá a contratar á nova xerencia, despois da marcha por xubilación da actual xerente, Catalina Sánchez Luengo.
O presidente da Fundación Expomar, Alfredo Llano, declarou que “celebramos unha reunión do padroado de Expomar para definir unha serie de cuestións que nos parecen fundamentais cara ao próximo ano, xa que hai que celebrar a exposición Expomar. Miramos como estaba a situación, cantos patróns seguen vixentes, e seguimos todos os que estábamos, temos algunha preocupación pola Cámara de Comercio, xa que non sabemos moi ben en que condicións está agora mesmo para contar con ela formalmente ou non, pero o resto seguimos igual. Está ABSA, o Concello, Armón, Pescados Rubén e a CEL, de momento somos os que formamos parte deste padroado”.
Llano explicou que “entre outras cousas o que decidimos foi as datas de celebración da Feira Náutico Pesqueira para o ano que ven, que van ser do 9 ao 12 de maio de 2019. Intentaremos que sexa unha feira adaptada á vangarda do sector pesqueiro e imos procurar organizar un evento acorde ás necesidades e ás exixencias actuais do sector. Tamén estivemos mirando o novo secretario para o padroado, dado que xa non contamos con Patricia Otero como concelleira, que era a secretaria actual, e en canto incorporemos ao novo concelleiro imos intentar facer unha renovación para decidir quen vai ser o novo secretario ou secretaria da Fundación Expomar”.
O presidente da Fundación Expomar engadiu que “estivemos falando das propostas de traballo para o ano que ven e organizar a feira. Soamente demos unhas pinceladas porque para que sexa en firme ten que estar o novo xerente. Decidimos facer unha nova contratación, dado que se xubila por idade quen estaba ata agora, que era Catalina Sánchez Luengo, que estivo facendo unha boa labor todos estes anos pero agora, ao chegar a súa xubilación, decidimos realizar unha contratación que faremos efectiva o antes posible, para que se poña ao cargo inmediatamente”.
Llano manifestou que “trataremos de conformar as condicións para que o ano que ven se poida facer unha boa feira exposición, un encontro empresarial e ter tamén unhas boas xornadas técnicas acorde ás esixencias do sector. Imos tratar de organizar unha feira coa importancia que debe ter este sector en toda a economía e a actividade que cremos que é moi importante para o noso concello de Burela”.