Ribadeo, 28 de novembro de 2018. Acisa sorteará 5.000 euros en vales de compra na VIII Festa do Comercio que terá lugar o 12 de xaneiro. A campaña de Nadal da comezo este sábado, 1 de decembro, e todas aquelas persoas que fagan as súas compras no comercio local obterán rifas para poder participar nese importante sorteo.
O presidente de Acisa, Francisco Iriarte, subliña “a contía que destinamos aos premios. Son 5.000 euros en vales de compra para gastar no comercio local asociado nun prazo de dous meses. Nesta edición da Festa do Comercio queremos dar premios grandes e así establecemos un primeiro premio de 2.000 euros en vales de compra, un segundo premio de 1.000 euros, un terceiro de 500 euros e dous cuartos de 250 euros cada un. E teremos un premio non presencial, que é moi importante, xa que estará dotado con 1.000 euros en vales de compra. Deste xeito pretendemos atender as peticións dos nosos asociados e asociadas de premiar tamén ao cliente de fora da comarca, que pasa por aquí para facer as súas compras de Nadal”.
O xerente da Asociación de Comerciantes, Industriais, Servizos e Autónomos, Jesús Pérez, sinala que “esta campaña busca premiar e agradecerlle á clientela do comercio e da hostalería de Ribadeo que merquen e que consuman aquí desde este mesmo momento, durante o Nadal e tamén nas rebaixas en lugar de facelo en grandes superficies comerciais ou en plataformas estranxeiras de venda on line”.
Iriarte subliña que “os premios presenciais non van quedar desertos, van tocar si ou si. Qué feliz vai marchar para a súa casa aquela persoa que leve 2.000 euros en vales de compra para gastar en Ribadeo, igual que as de 1.000 e as do resto dos premios. E como novidade este ano faremos o sorteo na carpa da pista xeo, que estará situada no Parque de San Francisco”.
Pérez lembra que “todas as persoas que fagan as súas compras en Ribadeo do 1 de decembro ao 12 de xaneiro terán a posibilidade de obter algún destes premios, 5 presenciais e 1 non presencial. Que ninguén marche de Ribadeo sen as súas rifas, sen as súas papeletas, que as pidan cando fagan as súas compras nos establecementos asociados a Acisa”.
Para participar no sorteo do 12 de xaneiro Jesús Pérez da uns cantos consellos: “hai que coller a parte máis estreita das rifas, que aparece perfectamente identificada, e metela na urna que haberá na carpa entre as 16:00 e as 20:30 horas do día do sorteo. E despois asistir ao sorteo, claro está. No caso do premio non presencial o número elixido darase a coñecer o mesmo 12 de xaneiro. Será seleccionado mediante un programa informático que escollerá de forma aleatoria un número entre os 200.000 que se repartirán durante esta campaña. O gañador terá ata o 18 de xaneiro para presentarse nas oficinas de ACISA Ribadeo para reclamar o seu premio. De non facelo perderá o dereito sobre o mesmo e considerarase deserto”.
Durante a campaña de Nadal Acisa organizará outras actividades para animar as compras destas datas: “contaremos cun Papá Noel para os máis pequenos, cun carteiro real, cunha bonita árbore de Nadal, que estará instalada na rúa San Roque e con algunhas outras sorpresas”.
Acisa Ribadeo estrea con esta campaña o logotipo conmemorativo do 30 aniversario de creación da asociación, que se cumprirá en 2019, e que aparece e estará presente en toda a cartelería ao longo dos vindeiros meses nos que se desenvolverán diversas actividades relacionadas con esta celebración.
Novas altas
Desde a directiva de Acisa amósanse moi satisfeitos coas 33 novas altas de asociados e asociadas que se rexistraron no que vai deste ano 2018. E danlle a benvida a hotel restaurante Javier Montero, mesón Morriña, Trece Eventos, Casa Fandín, Estudio 27 e Phone House, que foron as incorporacións das últimas semanas.
Acisa sorteará 5.000 euros en vales de compra na VIII Festa do Comercio que terá lugar o 12 de xaneiro. A campaña de Nadal da comezo este sábado, 1 de decembro
Relacionado
-
Medio Rural reafirma a súa aposta pola conservación e impulso das razas autóctonas na Feira de Gando de Augaxosa en Riotorto
-
O BNG denuncia que o Centro de Saúde do Valadouro volve quedar cun só médico tras dous anos de recortes
-
O CFEA Pedro Murias de Ribadeo arrinca o curso cun novo ciclo superior e récord de estudantes
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
A programación arrancará de 13:00 a 15:00 horas cos pinchos de benvida e unha sesión vermú a cargo do DJ Peabody. A continuación, de 15:00 a 17:00 horas, terá lugar a comida na Finca San Antonio, cun menú composto por salpicón de rape e langostinos, codillo con patacas, pan, postre, café, chupito e bebida incluída. Os tickets teñen un prezo de 40 euros e poden adquirirse en O Rincón, Confitería Alianza, Comercial Anjor e Perruquería Oriola; os menores de 5 anos asistirán de balde e os de 6 a 10 anos contan cun desconto do 50 %. Xa a partires das 18.30 horas haberá sesión de música con Toxo Guayaba.
