O Concello de Foz asinou un convenio coa Deputación de Lugo para a construción da nova canceira da asociación protectora de animais focense, na parroquia de Vilaronte, ao lado do punto limpo. O investimento é de 130.000 euros, dos que o Concello achega 40.000

O alcalde de Foz, Javier Jorge Castiñeira, explicou que “é un convenio importante de financiamento da nova canceira que se vai realizar en Escanlar, concretamente ao lado do punto limpo, na parroquia de Vilaronte. Con este convenio entre a Deputación e o Concello de Foz financiamos integramente a obra, que son arredor de 130.000 euros, dos cales 90.000 euros aproximadamente ponos a Deputación e os outros 40.000, o Concello”.
O rexedor focense subliñou que é “unha obra moi demandada e moi necesaria para a asociación protectora de animais de Foz, como vimos recalcando nos últimos anos. Inicialmente ía financiar a totalidade o Concello de Foz dentro dos orzamentos, pero como non foron aprobados no seu día polos grupos da oposición o Concello de Foz tivo que buscar outras alternativas. Neste caso atopamos á Deputación, dentro do acordo que hai entre os grupos provinciais dun reparto dunha cantidade de diñeiro a cargo de diferentes convenios”.
Javier Castiñeira engadiu que “agradecemos tanto á Deputación como a todos os grupos que o fixeron posible, neste caso o grupo popular que dentro da súa cota estableceu esta parte do financiamento. A partir de agora trataremos de licitar a obra o antes posible porque a idea é que na primavera poidamos ter xa esta infraestrutura tan necesaria. Polo tanto hoxe é un bo día, un día de noraboa, posto que as instalacións que hai actualmente son totalmente insuficientes. É un paso máis importante en aras do coidado dos animais no noso concello, que unha vez máis volve ser un municipio novidoso neste senso”.