Olimpíadas da Mariña Central

Alfoz 18-11-18. O vindeiro sábado, día 24 de novembro, no Pavillón Municipal de Alfoz, ás 17,00 horas, inauguraranse as Primeiras Olimpíadas da Mariña Central. Celebrarase nesta primeira xornada a Proba Cultural. Arredor de 70 veciños dos concellos de Burela, Cervo, Foz, Barreiros, Mondoñedo, Lourenzá, Valadouro e Alfoz competirán amistosamente nos xogos do “Un dous tres”, “Trivial” e “Stop”. Prégovos, se é posible, que lle deades cobertura mediática ó evento, posto que supón un acontecemento importante no intento de unidade da Mariña Lucense. A competición continuará os vindeiros días 1 de decembro (Proba Artística, en Burela), 6 de decembro (Fútbol Sala, en Foz) e 15 de decembro (Xogos Populares, en Mondoñedo). Gustaríame, se é posible, que vos fixerades eco dos resultados que se van producindo cada día, a fin de crear espírito competitivo e emoción, posto que a clasificación variará cada xornada en función dos resultados.

Para o acto inaugural do día 24, que consistirá en varios discursos e o tradicional desfile coas bandeiras dos concellos, contaremos coa presenza da case totalidade dos alcaldes dos oito concellos e esperamos contar con numeroso público que aumente a emoción do evento.

O acto estará presentado por Beatriz Yáñez (xornalista de Alfoz) e Pepe Peinó (Presidente do Seminario de Estudos do Valadouro). O Xurado, finalmente, estará formado por Celso Currás (Inspector de Educación e Ex Conselleiro de Cultura da Xunta de Galicia), Pilar García Porto (Delegada de Cultura da Deputación Provincial de Lugo), Francisco Rodríguez Lestegás (Decano da Facultade de Formación do Profesorado de Lugo) e Pablo Villapol (Responsable do xornal El Progreso na zona da Mariña).

Igualmente, durante o acto contaremos coa actuación da cantante alfocense, da parroquia de Bacoi, Almudena Cuadrado.

Todo isto é posible grazas ó enorme traballo dunha chea de asociacións e colaboradores da Mariña que, pese a múltiples dificultades xurdidas, conseguiron reunir xente e organizar a competición.

Os actos do día 24 seguirán o seguinte guión:

– Audición do Himno Olímpico, do compositor Jorge Olivera.
– Desfile dos 8 equipos e presentación dos participantes.
– Pequeno discurso dos Alcaldes.
– Discurso de Jorge Val, Alcalde de Alfoz, que declarará inauguradas estas Primeiras Olimpíadas da Mariña Central.
– Agradecementos ós colaboradores.
– Almudena Cuadrado interpretará o tema musical “Xuntos”, de Juan Pardo, con todos os equipos arredor.
– Celebración da Proba do “Un dous tres”.
– Celebración da Proba do “Trivial”
– Celebración da Proba do “Stop”.
– Actuación de Almudena Cuadrado, mentres o Xurado se retira a contabilizar os resultados da proba do “Stop” e os resultados de toda a xornada.
– Publicación dos resultados da Proba Cultural.
– Reparto de diplomas e medallas. Haberá medallas de ouro, prata e bronce para os participantes dos tres primeiros equipos clasificados.
– Clausura da primeira xornada.