Loureiro nega que o retraso das obras de saneamento da ría sexa culpa do Concello

 Viveiro, 27 de xuño de 2019. No día de onte, no Parlamento de Galicia, a Conselleira de Infraestructuras e Mobilidade anunciou que a Xunta iniciará a contratación das obras de mellora da depuradora municipal de Viveiro, en canto o concello remita a aprobación deste proxecto. Ademais de condicionar os prazos á axilidade do concello para a tramitación e á asunción de responsabilidades, asegurou que o concello é o principal responsable dos problemas de saneamento da ría, acusando a esta administración de non xestionar adecuadamente as obras de mellorar nin facilitar os trámites necesarios para que o faga a xunta, entre outras mentiras e faltas de respecto cara esta Alcaldía.
Ante a gravidade e falsidade das acusacións referidas, quero deixar claro que a demora do saneamento da ría de Viveiro non se debe, de ningunha maneira, ao Concello de Viveiro. Levamos anos denunciando a situación existente antes as administracións implicadas, realizando as xestións oportunas para axilizar os trámites, respondendo cada requirimento á maior brevidade posible, chamando puntualmente para obter información actualizada e solicitando reunións con Augas de Galicia e con Costas, tanto en Lugo como en Madrid.
No que vai de ano, o concello recibiu con respecto ao saneamento da ría catro requirimentos: o primeiro, recibido o 16 de xaneiro de 2019, foi contestado o 7 de febreiro de 2019; o segundo, recibido o 8 de maio, que foi contestado o 29 de maio de 2019; o terceiro, recibido o 20 de xuño, que foi contestado o 25 de xuño de 2019; e o último deles, que foi rexistrado de saída na Xunta de Galicia onte, ás 14:35 horas, e que recibimos hoxe mesmo.
É demencial que a Conselleira acuse a este concello de falta de axilididade, cando o último requirimento non fora aínda recibido por esta administración; repítese así o acontecido en maio, cando o candidato do Partido Popular á alcaldía de Viveiro e o Xefe Territorial da Xunta de Galicia fixeron referencia a outro requirimento que se enviara ese día
Cada vez que xorde unha nova polémica publicamente sobre o saneamento da ría, remítese un novo requirimento; non é que o concello envíe mal a documentación, é que cada vez se nos piden cousas novas. Nunha ocasión, a concelleira dixo que non é ela a que fai os informes; evidentemente, eu tampouco, son os técnicos os que emiten os informes e se encargan da tramitación, que se está axilizar o máximo posible tendo en conta que nós somos os máximos interesados do inicio das obras referidas, tendo en conta, ademais, que para contestar algúns dos requirimentos recibidos temos que solicitar informes ou documentación a outras administracións ou entidades.
As mentiras son inadmisibles e poño os expedientes municipais a disposición de todas aquelas persoas que queiran corrobarar este información.

A alcaldesa
María Loureiro García