O camiño de Santiago por Foz, a masonería na Mariña, o século XIV na comarca e os obxectos curativos e amuletos centran as xornadas de historia da Pomba do Arco

Foz, 27 de xullo, 2019. A casa da cultura “Poeta Manuel María” de Foz acolle os vindeiros 29,30 e 31 de xullo e o 1 de agosto unha nova edición das xornadas de historia de Foz organizadas pola asociación A Pomba do Arco desde fai vinte e catro anos e que xa se teñen convertido nunha referencia inescusábel da programación cultural focega en un punto de encontro de todas as xentes d´A Mariña amigas da historia.

O camiño de Santiago por Foz
As xornadas arrancan o luns 29 de xullo ás 20:30 na casa da cultura “Poeta Manuel María” de Foz cunha palestra a cargo do historiador focego Xoán Ramón Fernández Pacios titulada “O camiño de Santiago por Foz”. O investigador mariñán é unha destacada referencia dos estudos xacobeos no noso concello e no conxunto da Mariña, sendo autor de diversas publicacións inescusábeis no tema, como son os seus traballos sobre o Hospital de peregrinos de San Martiño de Mondoñedo ou o seu volume sobre o Camiño de Mar, que partindo de Ribadeo, percorrería toda á area costeira da Mariña até chegar a Ferrol, onde ligaría co Camiño Inglés. Unha das achegas centrais da tese de Pacios é documentar toda unha rede de hospitais de peregrinos na area costeira da Mariña, comezando polos existentes en Ribadeo, continuando polo de San Martiño de Foz, seguindo polo de Lieiro en San Cibrao e rematando no Hospital de Santa Ana de Celeiro.

A masonería na Mariña nos séculos XIX e XX
O martes 30 de xullo ás 20:30 a casa da cultura “Poeta Manuel María” de Foz acolle unha palestra do historiador coruñés Carlos Pereira Martínez sobre “A masonería na Mariña nos séculos XIX e XX”. Pereira Martínez, autor dunha abondosa obra bibliográfica centrada fundamentalmente na Idade Media e na época contemporánea, é unha das voces máis autorizadas no ámbito dos estudos sobre a masonería, con diversos traballos publicados en diferentes medios galegos. Pereira comezará o seu percorrido pola masonería n´A Mariña reparando nas agrupacións de masóns que funcionaron nas últimas décadas do século XX con diversas loxas operando nas localidades de Ribadeo, Viveiro e Mondoñedo, onde se significaría a persoa do medico e escritor Manuel Leiras Pulpeiro. A súa palestra rematará referíndose aos núcleos masónicos existentes no período republicano antes de que o franquismo iniciase unha persecución brutal do mesmo, con loxas funcionando en Viveiro, cuxa relación de membros aínda se conserva, un triángulo na parroquia do Vicedo de San Román do Val e membros aislados noutros concellos que participan en loxas de Lugo, A Coruña, Ferrol ou Xixón.

O século XIV. Un momento decisivo para A Mariña.
O mércores 31 de xullo ás 20:30 na casa da cultura “Poeta Manuel María” de Foz o ensaísta e investigador Francisco Rodríguez Sánchez impartirá unha palestra titulada “O século XIV. Un momento decisivo para A Mariña”, onde nos achegará a unha centuria chave para entender a realidade da nosa comarca. Rodríguez, autor dunha ampla produción bibliográfica no ámbito dos estudos sociolingüísticos, literario e históricos, até o punto de que algunhas das súas obras son referencias inescusábeis nestes materias, explicaranos os cambios que se producen en Galiza e na nosa comarca no contexto dos enfrontamentos da guerra dos cen anos e do petrismo e o trastamarismo. A consecuencia destes feitos nacerá o Condado de Ribadeo, entregado por Enrique de Trastamara ao mercenario francés Pierre Villaines que o apoiou na guerra contra os galegos, a revolta dos veciños de Viveiro contra o bispo de Mondoñedo e a consecución da vila de reguengo ou a clausura do porto da Masma polos Trastamará, que fanará as posibilidades do desenvolvemento comercial de Foz.

Obxectos curativos e uso de amuletos na cultura popular.
A clausura da actual edición das xornadas correrá a cargo do antropologo pontevedrés Rafel Quintiá Pereira que falará o xoves 1 de agosto ás 20:30 na casa da cultura “Poeta Manuel María” de Foz sobre os “Obxectos curativos e uso de amuletos na cultura popular”.Antropologo profesional, fundador do Grupo de Estudos Etnográficos Serpe Bichoca e tamén fundador e presidente da Sociedade Antropolóxica Galega, director da publicación Fol de Veleno. Revista de historia e etnografía de Galiza e autor dunha ampla bibliografía, entre a que destacaremos Análise estrutural e simbólica do mito da moura galega, Mariña, de deusa a santa. A advocación de Santa Mariña na cristianización da Gallaecia e Ritualista protectora, obxectos curativos e uso de amuletos na cultura popular galega. A palestra de Quintiá Pereira achegaranos á antropolxía dos obxectos curativos, como a pedra do raio, ou dos amuletos, alguns deles como o ollomao, e moi especialmente aos vinculados ao mundo do mar, ligando ao papel que cumpren na nosa cultura e na area atlantica e portuguesa