O BNG apoiou as reivindicacións dos obreiros e obreiras de Alcoa na manifestación ante a Subdelegación do Goberno en Lugo

 Lugo, 25 de xuño de 2020. O BNG sumouse á concentración que os obreiros e obreiras da factoría de aluminio de San Cibrao mantiveron esta mañá en Lugo para reclamar á Xunta e ao Estado que poñan en marcha os mecanismos necesarios para garantir a continuidade dos empregos e da produción de aluminio no complexo industrial de Cervo.
O persoal de Alcoa e das industriais auxiliares concentrouse fronte á Subdelegación do Goberno despois de reunirse cos responsables da empresa, que iniciou formalmente a tramitación do Expediente de Regulación de Emprego (Ere) que afecta un milleiro de traballadores entre empregados directos e obreiros das auxiliares.
O BNG reiterou a súa aposta pola intervención da empresa como única saída para salvar os postos de traballo e a produción de aluminio. “Temos despidos enriba da mesa. Xa non vale unha declaración de intencións, os gobernos teñen que reccionar e deixarse de palabrería”, urxiu a responsable comarcal do BNG, Ana Ermida.
“Trátase de salvar a industria do aluminio na Mariña, de salvar eses postos de traballo e os que virán detrás e a única saída posible neste momento é apostar pola intervención pública. O goberno do Estado debe poñela enriba da mesa, e a Xunta traballar para que se produza esa intervención. Está en xogo o futuro dun comarca e non caben medias tintas. É o momento de actuar con contundencia”, sostivo a nacionalista.
Ademais da responsable comarcal e alcaldesa de Barreiros, sumáronse a concentración representantes institucionais da formacion como Xavier Fanego, tenente de alcalde de Foz; os deputados provinciais Maite Ferreiro e Efrén Castro ou o tenente de alcalde de Lugo, Rubén Arroxo, así como outros concelleiros e concelleiras nacionalistas na provincia.
O grupo provincial do BNG presentará no vindeiro pleno da Deputación de Lugo, o vindeiro 30 de xuño, unha moción para reclamar aos gobernos do Estado e da Xunta a nacionalización de Alcoa.