Burela, 3 de abril, 2021. As Guerreiras Laranxas están imparables no arranque da segunda fase con sabor irmadiño. O Pescados Rubén Burela FS deixou a súa pegada de novo en derbi galego impoñéndose 4-1 sobre o Poio Pescamar. Tras o 1-1 ao descanso, as mariñás volveron á pista máis centradas e gañando en intensidade; a volta de vestiarios outorgoulles a vantaxe de 3-1 en tan só un minuto, que ampliaron a porta baleira na aposta de cinco de Manu Cossío.
O dominio e comodidade iniciais das mariñás derivaron en certas perdas de concentración que provocaron desaxustes perigosos para os intereses locais. Poio plantouse en Vista Alegre con defensa intensa en media pista para ir subindo aos poucos e tentar aproveitar así os erros mariñáns. O luminoso tivo estrea laranxa, con Dany en estratexia; a falta de 53 segundos para o ecuador do primeiro acto, o saque de esquina de Luísa Mayara a Ale de Paz deu o toque de saída. Poio recuperou táboas tres minutos despois precisamente en recuperación de Rivera sobre Peque. O luminoso mantívose sen cambios na primeira parte. Tras as perfectas aparicións de Sandra Buzón sacando a man por arriba ante a tentativa de Luci e freando a pena máxima de Clara no minuto 17, o Pescados Rubén tampouco puido aproveitar para poñerse por diante. No 18, Peque a punto estivo de dar a sorpresa desde pista laranxa, e no 19 Leti rozou o remate fronte a Caridad na chegada da capitá.
Regresou en avalancha o conxunto local para non deixar escapar nada. En tan só un minuto abriu a fenda ata o 3-1, no 23, coa capitá, Peque, sentenciando un gran contragolpe de Jane a Dany, e no 24 de novo con firma da 3 laranxa tras un perfecto entendemento entre Cami e Peque. Manu Cossío apostou por xogo de cinco con Irene pero a recompensa caeu de forma inmediata nas filas burelitas, co 4-1 de Jozi Oliveira a porta baleira. Con esa primeira acción, o Poio desistiu da porteira xogadora. Ale de Paz a punto estivo de anotar o quinto no 32 gañando a partida ante a defensa visitante; evitouno o traveseiro. Con máis de catro minutos por diante, Irene volveu enfundarse na camiseta de porteira xogadora sen éxito. Aínda dispuxeron as burelistas de dúas de ouro para ampliar a renda, con boa resposta de Caridad, no penalti de Cami e o dobre penalti de Peque.
Ficha técnica
Pescados Rubén Burela FS: Sandra Buzón, Dany, Peque, Cami, M. Cortés, cinco inicial; tamén xogaron Ale de Paz, Bea Mateos, Luísa Mayara, Jane, Lara Balseiro, Jozi
Poio Pescamar FS: Caridad, Miriam, Daniella, Luci, Rivera, cinco inicial; tamén xogaron Antía, Clara, Agostina, Irene, Julia
Goles: 1-0, minuto 10, Dany; 1-1, minuto 13, Rivera; 2-1, minuto 23, Peque; 3-1, minuto 24, Dany; 4-1, minuto 28, Jozi Oliveira
Árbitros: Menéndez Nistal // Vilas López. Por Burela amarela a Peque (minuto 6), Dany (minuto 39). Por Poio amarela a Antía (minuto 15), Rivera (minuto 37), Luci (minuto 40)
Incidencias: Partido correspondente á xornada 2 da segunda fase de Primeira División Feminina disputado en Vista Alegre. O Concello de Burela quixo render homenaxe a Luci; recibiu a antiga burelista en Vista Alegre facéndolle entrega dun detalle conmemorativo do título de liga conquistado en Málaga coa camiseta laranxa.
A proba, organizada polo CP Altrúan, reuniu máis de 130 palistas dos seis clubs lucenses de augas tranquilas que participan na competición: o propio Altruán, o CD San Ciprián, o Club Kayak Foz, o CP Viveiro Urban Hotel, o Cidade de Lugo e o Club Fluvial de Lugo. O deputado de Mocidade Daniel García entregou os premios da proba, na que Club Fluvial de Lugo, Cidade de Lugo e Altruán coparon o podio por equipos. A Copa Deputación de Piraguismo, que conta de 6 regatas, organízase no marco da colaboración que a Vicepresidencia da Deputación de Lugo mantén coa Federación Galega de Piragüismo para a promoción deste deporte, ofrecendo aos clubs a posibilidade de participar en competicións federadas nas súas comarcas e contribuíndo así á consolidación de equipos de base.
Malia a intensa calor, o pavillón encheuse de público para gozar das actuacións das numerosas alumnas, que ofreceron exercicios individuais, por parellas e en grupo, destacando pola súa beleza e dificultade técnica ao ritmo da música escollida. Ao remate, a concelleira Ana Rubal entregou medallas ás participantes, que tamén agradeceron o traballo e os valores transmitidos pola súa monitora, Lorena Fernández. Lémbrase que a festa de clausura das Escolas Deportivas terá lugar o luns 29 ás 19:00 horas, nun acto conxunto co Concello de Alfoz, no que haberá diversas actividades de celebración e a entrega de diplomas.
A cantante e instrumentista asturiana Mónica Acevedo actuará en formato solista, mentres que o equipo do local ofrecerá un menú especial con pratos como o tartar de xarda, gañador do “Ribadeo Sabe”, gazpachuelo de tempada, lomo de sardiña con berenxena afumada, cóctel de lagostinos, bonito de Burela con melocotón asado e sopa de cebola, e solombo de porco celta con xudías tenras. A cita comeza ás 21:15, con prazas limitadas e reserva imprescindible.
A xornada incluíu tamén o IV Torneo de Pádel, que continuará durante a fin de semana. O evento, organizado polo Concello xunto con ASAPA e Miño Vivo e coa colaboración da Xunta, recupera unha iniciativa nacida hai catro anos a petición da mocidade, coa intención de consolidala no tempo. O tenente de alcalde, Marcos García Lombardero, destacou a alta participación —catro veces maior ca na primeira edición— e agradeceu a implicación de entidades, colaboradores e asistentes, así como a presenza de representantes da Xunta, do Parlamento e da Deputación.
Adultos, nenos, familias, grupos de amizades fixeron o percorrido nun día espectacular de sol e cunha temperatura de 26º á hora da saída. Acudiron á cita o presidente provincial da AECC, José Manuel Rozas, o alcalde de Ribadeo, Dani Vega, as concelleiras e concelleiro ribadenses, Marta Saiz, Begoña Sanjurjo, Elena Sierra e Francisco José Silvent, a presidenta e o xerente de Acisa, Carmen Cruzado e Jesús Pérez, así como representantes da AECC de Ribadeo coa súa presidenta, Tea Martínez, á cabeza. A II Andaina Ribadeo en marcha contra o cancro contou co patrocinio de Solán e Acisa Ribadeo e coa colaboración do Concello de Ribadeo, Eroski e 2M.
A partir das 19:45 horas abrirán a xornada o Cuarteto Illa Pancha e Tradigalu, mentres que desde as 20:00 horas se poderán degustar hamburguesas á parrilla, bocadillos de panceta e chourizos asados. Xa pola noite, ás 21:30, tomarán o relevo Mi Rollo es el Rock, antes da tradicional fogueira de San Xoán, prevista para as 00:00 horas. A celebración, organizada por A Rebolaxe coa colaboración do Concello de Cervo e a Deputación de Lugo, inclúe tamén o sorteo dunha paleta de cocho e contará con aparcamento habilitado no Estanco da Praia do Torno.
Pasada a medianoite, un vehículo saíuse da vía na N-634. Como consecuencia do impacto, tres persoas resultaron feridas. Da asistencia sanitaria ocupáronse os profesionais de Urxencias Sanitarias de Galicia-061 e os axentes da Garda Civil de Tráfico da seguridade na vía. Os Bombeiros de Barreiros tamén acudiron, sen embargo, ningún dos feridos estaba atrapado.
