Poder cruzar a ría é cuestión de días

Ribadeo, 5 de maio de 2021. O alcalde, Fernando Suárez, agarda con prudencia que pronto se reanuden as comunicacións entre Asturias e Galicia, unha vez que remate o estado de alarma. O rexedor cualifica de experiencia inédita e moi dura a vivida polos veciños e veciñas de Ribadeo e do Occidente asturiano, que levan moitos meses sen poder estar cos seus familiares e amizades.

Suárez Barcia dixo: “o valoramos con moita prudencia. Oxalá que así se confirme esta noticia e que dentro de poucos días poidamos volver reencontrarnos, porque a verdade é que botamos moito de menos aos nosos amigos e aos nosos familiares en moitas ocasións, durante todo este tempo que non puidemos estar con eles e non puidemos ir alí, como supoño que os do Occidente tamén nos botarán de menos a nós”.

O alcalde manifestou que “queremos ir a Tapia, á Veiga ou a Castropol como supoño que os de Taramundi, os dos Oscos ou os da Caridad, por poñer por caso, tamén estarán desexosos de volver andar, pasear e comprar en Ribadeo, e quen di Ribadeo di en toda A Mariña”.

O rexedor ribadense sinalou que “todos estes meses a verdade é que supuxeron unha experiencia inédita, moi dura, e que se ampliou por moitísimo tempo, e agardemos agora que poida ser realidade dentro duns días, se as circunstancias sanitarias o permiten, que esperemos que si. Estamos todos detrás da ciencia, a ciencia é a única que nos vai salvar e neste caso esperemos que así sexa canto antes”.

Fernando Suárez cre que “máis aló de falsas e artificiosas polémicas alimentadas moitas veces co nome da ría, moitas veces por quen non ten que facer, eu penso que estes si que son os verdadeiros lazos que nos unen”.