O Concello de Cervo mellorará o local social do burgo de Lieiro

O rexedor, e as edís de Obras e Cultura, mantiveron un encontro con membros da asociación de veciños, demandado por eles, no que abordaron diferentes cuestións de relevancia para a parroquia

Cervo, 20 de marzo de 2023. O alcalde de Cervo, Alfonso Villares, o edil de Zona Rural, Alfredo Fernández; e as edís de Obras, e Cultura, Mali Méndez e Dolores García Caramés, respectivamente, mantiveron un encontro con varios membros da asociación de Veciños Nosa Señora de Lieiro, a petición deles, no que abordaron diferentes cuestións de relevancia para o desenvolvemento da parroquia.

O encontro tivo lugar no Local Social do burgo, e tamén contou coa presenza dos técnicos, porque un dos temas nos que se fixo maior fincapé foi no de mellorar estas instalacións, en concreto a cuberta e os accesos do local social “para o que xa adquirimos un compromiso con eles e xa estamos a traballar na redacción do proxecto”, precisou o alcalde.

Villares afondou en que esta actuación vai en consonancia coa liña argumental que vimos marcando desde o Goberno municipal, de favorecer o asociacionismo e o dinamismo nos diferentes burgos do Concello mantendo os locais públicos na mellor das condicións como lugares de encontro da veciñanza, para o seu uso e desfrute, e como epicentro das diferentes actividades lúdico, culturais e sociais que promoven ao longo do ano e que enchen de vida os diferentes recunchos do municipio.