Asociacións locais de Barreiros propoñen a realización dun debate público entre as persoas candidatas á Alcaldía

Barreiros, 10 de abril, 2023. Co gallo da celebración das eleccións municipais o vindeiro 28 de maio e co obxectivo fundamental de que a cidadanía coñeza as propostas das distintas formacións políticas candidatas ao goberno de Barreiros, un conxunto de asociacións locais propoñern (ao igual que se fixo no ano 2015 e no ano 2019), a realización dun debate público en Barreiros entre as persoas candidatas á Alcaldía das candidaturas presentadas.

Este debate, de carácter público e absolutamente imparcial, proponse como un complemento imprescindible aos mítin electorais que poidan organizar os diferentes partidos políticos, coa idea de que a cidadanía teña a posibilidade de coñecer e confrontar de primeira man as propostas dos grupos políticos que concorren aos comicios, e nun espazo no cal se respecten as normas establecidas pola Xunta Electoral para os debates públicos.

Así pois, diríxese esta carta ao movemento asociativo de Barreiros coa finalidade de informar de dita iniciativa e convidar á totalidade de asociacións do concello de Barreiros a participar nunha reunión informativa e preparatoria do evento o XOVES 13 DE ABRIL ÁS 20H. NO CENTRO SOCIOCULTAL MANUEL DÍAZ SAMPEDRO, EN SAN COSME DE BARREIROS.

A adhesión dunha asociación a esta iniciativa plantéxase como a posibilidade de aportar temas a debatir e preguntas de interese xeral dirixidas á totalidade de cantidatos/os.

Esta iniciativa ten carácter asociativo e aberto polo que se prega ás asociacións receptoras desta carta que a compartan con aquelas outras asociacións de Barreiros e que puideran ter interese en participar coa finalidade de chegar conxuntamente a todo o movemento asociativo local.