A Xunta afirma que o Concello de Viveiro non pediu a liña de axudas para impulsar a praza de abastos

Na presente anualidade, xa pechada, ofertou axudas de ata 221.000 euros para aquelas que non contan aínda co selo de Mercado Excelente

Lugo, 28 de setembro de 2023. A Xunta de Galicia convoca un programa específico de axudas para o impulso dunha Rede de Mercados Excelentes de Galicia e a dinamización das prazas de abastos, aberta a todos os concellos galegos, á que non optou o Concello de Viveiro.

Neste sentido, a Xunta aclara que as solicitudes de achegas para a praza de abastos ás que se refire o Concello de Viveiro non corresponden a este programa, senón á convocatoria do Instituto de Estudos do Territorio para a eliminación de impactos paisaxísticos e, tal e como recoñece a alcaldesa, foron denegadas por esgotamento de crédito, xa que se concedían por orde de entrada a todos os que cumprían os requisitos.

O Concello de Viveiro podería ter optado ás achegas para a mellora das instalacións, dos servizos para a clientela, o equipamento comercial e a eficiencia enerxética das prazas de abastos que se convocou o pasado mes de abril. Na presente anualidade, xa pechada, as axudas podían ser de ata 221.000 euros para os mercados que non contan aínda co selo de Mercado Excelente, e 181.000 euros no caso de mercados que xa o teñen, con apoios de ata o 80% do investimento subvencionable, dependendo do tipo de actuación a desenvolver.

Nos mercados que, como o de Viveiro, non contan aínda con ese distintivo, debe iniciarse o procedemento para obtelo, e unha das actuacións subvencionables que necesariamente debe solicitar o concello é encargar a elaboración da diagnose de situación e usos do mercado por unha empresa de consultoría especializada.

As asociacións de prazas de abastos e mercados e as federacións tamén poden solicitar axudas, de ata 11.200 euros e 38.400 euros respectivamente, para accións de dinamización comercial, loxística e-commerce, ou o equipamento persoal dos praceiros coa imaxe común e corporativa do mercado e o equipamento dos posto, entre outras.