Lourenzá, 19 de setembro de 2023. A programación da XXXI Festa da Faba de Lourenzá, que se celebrará desde o día 29 deste mes ata o 1 de outubro, inclúe como novidade o Faba Fest. Será o venres pola noite no Campo dos Bolos e contará coa actuación do Grupo Beatriz e dos DJ Pedro Brmudz e Litainer, con entrada gratuíta. Ademais o programa inclúe outras actuacións musicais, degustacións e venda de fabas, exposicións e demostracións de artesáns, showcooking, cata de viño, tren turístico, concentración de vehículos clásicos e outras actividades.
Os actos empezarán o venres 29 ás 19:00 horas cun pasarrúas da Fanfarria Furruxa, que tamén actuará no Claustro do Mosteiro ás 21:00 horas. Ese día haberá ademais unha cata comentada de viño a cargo da adega Tapias Mariñán, da Denominación de Orixe Monterrei. E a partir das 22:30 horas no Campo dos Bolos, xunto ao mosteiro, terá lugar o Faba Fest, no que actuarán o Grupo Beatriz con seu espectáculo The pink tour, ademais dos DJ Pedro Bermudz e Litainer.
O sábado 30 ás 11:00 horas abriranse as casetas dos fabeiros e o stand institucional do Concello de Moeche, na Praza do Conde Santo. Tamén haberá demostracións e exposición de artesáns en varias prazas e rúas da vila, feira exposición de automoción e vehículos agrícolas na Praza Linares Rivas e no Campo dos Bolos, e a novena edición da Vespafaba & Clásicos, concentración de scooters e motos clásicos na rúa Fernández del Riego. Á mesma hora a Banda de Música de Lourenzá ofrecerá un pasarrúas e ás doce do mediodía na praza do Conde Santo terá lugar a lectura do pregón que deu Francisco Fernández del Riego en 1998, a cargo de Xulio Leal, actor do grupo Avelaíña Teatro, de Pontevedra. No mesmo lugar ás 12:30 horas haberá un showcooking do cociñeiro Álex Iglesias, do programa da TVG Tupper Club. Ás 13:30 horas as actividades trasládanse ao Campo dos Bolos, onde terá lugar unha sesión vermú coa orquestra Principal e degustación popular da Faba de Lourenzá e viños da adega Tapias Mariñán, de Monterrei.
Pola tarde a partir das 16:30 celebrarase a XIII carreira popular Val das Fabas e ás 19:00 horas no claustro do mosteiro actuará o grupo Sons de Celeiro. E a partir das 22:30 no Campo dos Bolos haberá verbena coa orquestra Principal e concerto do cantante laurentino Jonydasvie.
E o domingo 1 de outubro ás 8:30 horas abrirase no mercado comarcal o mercado de faba ao por maior e ás 10:00 horas as casetas dos fabeiros na praza do Conde Santo. A partir das 11:00 horas terá lugar a concentración de coches clásicos da IX Vespafaba & Clásicos na rúa Fernández del Riego e pasarrúas da charanga Louband. Ás doce do mediodía o dúo Bellón Maceiras actuará no claustro do mosteiro e ás 12:30 horas na praza do Conde Santo haberá un showcooking a cargo do cociñeiro Álex Iglesias, do programa da TVG Tupper Club. Ás 13:00 horas volverá o pasarrúas da charanga Louband e media hora despois no Campo dos Bolos terá lugar unha sesión vermú co trío Kalima e degustación popular da faba de Lourenzá e de viños da adepta Tapias Mariñán. As actividades rematarán ás 18:30 horas no claustro do mosteiro cun festival folclórico no que actuarán a asociación cultural Osorio Gutiérrez e Cantigas e Agarimos.
Durante os tres días do evento os bares da vila servirán tapas elaboradas con fabas de Lourenzá e nas xornadas do sábado e o domingo un tren turístico levará a veciños e visitantes a percorrer a Ruta das Fabas.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
