“Móllate polos ríos” volve a Foz

Foz, 18 setembro 2023. A XVI Limpeza Simultánea “Móllate polos ríos” celebrarase este ano en mais de 50 concellos de toda Galiza, e participarán máis de 65 entidades (asociacións, concellos, colectivos ecoloxistas, centros de ensino…). O Concello de Foz sumouse a esta iniciativa dende 2021. A limpeza será o 24 de setembro e mobilizará a numerosas persoas voluntarias que se desprazarán aos ríos destes concellos para deixalos libres de lixo, nunha xornada de voluntariado ambiental e concienciación social.

Os ríos son os hábitats en maior perigo ambiental, po lo que a súa conservación é responsabilidade de todas. En Foz realizará a coordinación da limpeza a Concellería de Medio Ambiente e persoas voluntarias do Proxecto Ríos. O lugar, o río Alemparte en Cangas o día 24 de setembro a partir das 11 h.

O Proxecto Ríos é un programa de Educación e Voluntariado Ambiental que ten a finalidade de dar a coñecer o importante papel dos cursos fluviais, amosar as súas problemáticas, así como fomentar iniciativas que permitan á cidadanía o mantemento e a mellora dos ríos proporcionando as ferramentas que garantan a súa participación. Cada persoa voluntaria será agasallada cunha camisola e deberá levar as súas propias luvas, preferiblemente de tipo fregar para evitar residuos das de látex e calzado axeitado. A organización facilitará o resto do material para a recollida. A actividade conta tamén cun seguro de accidentes po lo que é necesario anotar previamente as persoas participantes maiores de idade. As menores deberán obrigatoriamente estar acompañadas en todo momento dunha persoa adulta. A Anotación será no enderezo patrimonio.medioambiente@concellodefoz.es con data límite o 22 de setembro.