Pontón en Viveiro: “O escano do BNG é o que marca a diferencia en defensa de Galiza e que tamén defende unha Europa pola paz”

En Viveiro, a líder do BNG defende declarar Galiza zona altamente dependente da pesca e que teña “voz e voto” no Consello de Pesca

Santiago de Compostela, 26 Maio 2024. A portavoz nacional, Ana Pontón, pediu no mitin de Viveiro unha gran mobilización de toda a cidadanía que quere que Galiza teña voz propia en Bruxelas, reclamando un apoio masivo nas urnas á papeleta do BNG que lidera Ana Miranda para garantir un escano galego en Europa. “Somos a candidatura de toda esa cidadanía que quere que Galiza teña unha voz forte e libre que a defenda na Eurocámara e, ao mesmo tempo, que esa voz se alce a favor dunha Europa social, antimilitarista e pola paz”.

“O escano do BNG é o que marca a diferencia en defensa de Galiza e doutro modelo de Europa que inclúe todas as causas xustas, unha Europa social, pacifista, dos pobos”, salientou a líder nacionalista, quen puxo o traballo feito como o “mellor aval” para solicitar o apoio da cidadanía o 9 de xuño, fronte a unhas forzas estatais que só ven Galiza como un graneiro de votos. Foi o BNG quen defendeu o dereito dos sectores produtivos, as infraestruturas estratéxicas, a rexeneración das rías ou un reparto equitativo de cotas de pesca.

Neste sentido, en Viveiro a líder nacionalista subliñou que unha das prioridades do traballo político do Bloque ante as instituciós comunitarias será reclamar que Galiza sexa declarada zona altamente dependente da pesca, así como unha reforma da Política Pesqueira Común para que deixe de dar un trato discriminatorio á frota galega na adxudicación de TACs e cotas. Ademais, alegou Pontón, o sector da pesca é un exemplo de que Galiza ten que ter dereito a decidir, “voz e voto” nas mesas de negociación nas que se toman decisións sobre asuntos estratéxicos para o País, “a pesca e o marisqueo é un deles”, subliñou.

Galiza ten 1.500 quilómetros de costa e unha das frotas de pesca máis importantes da UE, Bélxica ten 70 quilómetros de litoral e unha mini frota, pero está no Consello de Pesca e Galiza non, explicou Pontón, “hai que mudar este tipo de situacións que non teñen sentido”.

Na Mariña, Pontón tamén fixo referencia á multitudinaria manifestación celebrada hoxe en Palas de Rei, lembrando que foi o BNG quen en 2013,pelexou en Europa para frear a macromina de Corcoesto, “e no 2024 estamos loitando para frear a bomba ambiental da macrocelulosa de ALTRI que o PP quere colocar no corazón deste país, paramos a desfeita de Corcoesto e, man a man coa xente, imos parar a desfeita de ALTRI”, destacou.

Pontón destacou que por moi lonxe que pareza Bruxelas da Mariña, a Unión Europa adopta cada día decisións que afectan na vida dos e das galegas. Galiza “xógase moito” nas eleccións europeas e por iso é tan importante estar alí con voz propia, libre, sen ataduras, para defender os intereses deste País como fixo o BNG da man de Ana Miranda “e como imos seguir facendo a partir do 9 de xuño con máis forza que nunca”, recalcou.

A portavoz nacional destacou que sen o BNG, Galiza estaría completamente desaparecida da axenda europea, “e isto é algo que coñece ben a cidadanía”, por iso é fundamental ter un escano galego que teña como “única lealdade” servir a este País e a súa xente. “Somos o equipo da casa, o único que vai defender as cores de Galiza, desde a razón e desde o corazón, con toda a nosa a forza fronte a un Partido Popular que mira cara Madrid, cada vez máis centralista e ultra, e aí esta Rueda manifestándose ao lado dos sectores máis reaccionarios do Estado”.

“A lealdade de Rueda está na rúa Génova, está co lobby eléctrico, está coas súas empresas amigas, está coas multinacionais enerxéticas. Por contra, no BNG só temos unha lealdade: cos galegos e coas galegas e por iso podemos presentarnos o 9 de xuño ante a cidadanía e pedirlle o seu apoio co aval do traballo feito, co orgullo de ter defendido os intereses deste País, antes, agora e sempre”, subliñou.

Pontón rematou facendo unha apelación a participar na cita coas urnas, non deixarse levar pola estratexia de baixo perfil e de indiferencia cara as eleccións europeas que están promovendo “os mesmos poderes que queren que nada cambie, tampouco na UE, que queren manter o seu status quo, son os mesmos poderes que, sen pasar polas urnas, impoñen a través das forzas políticas que os apoian a precariedade, os recortes nos servizos públicos, -mentres aumentan o gasto militar-, e os recortes en dereitos laborais, dando prioridade ós beneficios obscenos do gran capital mentres as maiores sociais se empobrecen”.

“Coller masivamente a papeleta do BNG o 9X é unha maneira de derrotar a eses poderes que impoñen unha Europa dos mercaderes para axudar a construír unha Europa das persoas”, concluíu.