Os concelleiros do PP enumeran, entre outras deficiencias: suciedade e falta de pintura no muro do paseo, en catro das cinco pérgolas, farois e baldosas rotas, bancos deteriorados, herba sen rozar, fochancas na estrada paralela -especialmente na confluencia entre o parque Pernas Peón, o campo de fútbol de Cantarrana e o paseo-, pintadas nas duchas ou luminarias e varandas do espigón inexistentes
Viveiro, 4 de xuño de 2024. O Grupo Municipal Popular ten moi presentes as necesidades de Viveiro. Unha delas son “as deficiencias causadas polo abandono por parte do goberno municipal e a falta de mantemento dun dos espazos máis emblemáticos da nosa cidade: o paseo de Covas”. Así, os concelleiros esixirán ao goberno municipal no pleno deste mércores que “adopte as medidas necesarias para reparar os numerosos danos do paseo marítimo de Covas e que se corrixan esas deficiencias”.
Os populares destacan que “o paseo marítimo de Covas é considerado un dos paseos costeiros máis importantes da xeografía galega e, ademais, é unha zona moi transitada durante todo o ano tanto por veciños como por visitantes”.
Os concelleiros explican que “entre a ponte da Misericordia e as proximidades da praia de Seiramar -a pesar da inmellorable contorna- apréciase un deterioro, cada vez maior, a consecuencia dunha clamorosa clamorosa desatención e dunha falta de mantemento por parte do goberno local durante anos, algo que non resulta comprensible ao tratarse dun escaparate e un espazo representativo da nosa cidade”, engaden.
O Grupo Municipal do PP advirte tamén da mala imaxe das pérgolas: “a suciedade e un aspecto ennegrecido pola falta de pintura son unhas constantes ao longo do muro que separa o paseo da praia, algo que se fai patente nas pérgolas do paseo. Das cinco que hai, soamente se pintou unha quedando as outras catro cun aspecto manifestamente mellorable”.
Tamén sinalan dende o PP local a existencia de “farois rotos, bancos de pedra deteriorados -algún tamén roto-, ou zonas axardinadas ao longo de todo o paseo con herbas altas sen rozar ás portas do verán. E tamén vemos como bastantes baldosas do paseo están rotas ou deterioradas”.
“Por se fora pouco, os condutores tamén sofren as fochancas no firme da estrada que discorre paralela ao paseo pola avenida Luis Cebreiro que se aprecian especialmente no tramo adxacente ao parque Pernas Peón e ao campo de fútbol de Cantarrana e, máis aínda, nas proximidades do cruzamento que une o parque, o campo e o paseo. E a sinalización horizontal e os pasos de peóns necesitan unha capa de pintura e algúns sinais verticais tamén necesitan mellora”, engaden.
Outras deficiencias que enumeran dende o PP son as pintadas das duchas da praia “que non dan a mellor imaxe” ou varias luminarias dos laterais do chan do espigón que xa non funcionan e bastantes varandas que separan o paseo das rochas que están partidas ou desaparecidas “co consecuente perigo que iso pode supoñer”, advirten.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
