Este ano 2024 será ano de bater records de recepción de turistas (máis de 600 millóns) na Europa, segundo euronews. Mais para os destinos máis elixidos, como Mallorca, Eivissa, Venecia, Barcelona, a illa grega de Santorini, Tenerife ou Lanzarote o turismo xa achega para a persoas residentes grande cantidade de inconvenientes, ao tender substituír os aloxamentos e os servizos para residentes em aloxamentos turísticos (e segundas residencias) e servizos pensados para as persoas visitantes. Común en todos estes lugares é a denuncia da falla de dispoñibilidade de vivenda a un prezo razoábel.
Ademais, estudos recentes reflicten que o 80% do gasto turístico desenvolvido a medio da merca de paquetes completos de “todo incluído” non chega ao destino local. Velaí a conveniencia de orientar um turismo responsábel que contrate directamente no seu destino o aloxamento e que priorice os mercados e establecementos de restauración locais a respecto das cadeas internacionais.
No noso país xa existen nidias pegadas de saturación turística, determinadas épocas do ano, en Compostela (case un millón de turistas no 2023), Sanxenxo e O Grove, asi como nalgúns destinos de Ribadeo e Fisterra. Por outra banda, o custo ambiental do turismo de cruceiros da Coruña e Vigo é moi importante. Velaí que o concello compostelán propuxese á Xunta a implantación dunha taxa turística que grave as pernoctacións como as xa existentes em Barcelona, Mallorca ou Corfú, que permita aos concellos destinar eses recursos extraordinarios ao custo ambiental que sofren estas vilas e cidades. Mais Rueda e o PPdeG teiman nun modelo de promoción turística caduco, de fomento do número sob a calidade, negacionista canto as súas deficiencias. Xa que logo, na práctica ten vetado a proposta para non emitir-disque- unha mensaxe aos mercados de “limitación”. Sen o marco dunha lei galega os concellos non poderán implantar esta taxa.
O fenómeno fodechincho está conectado en certo sentido coa saturación turística, mais presenta uns caracteres de seu que o independizan. O profesor Antón Losada (USC) nun vídeo recente que se fixo viral nas rr.ss., resumiu ben tres destes caracteres: un sentimento de superioridade que lles fai desprezar os riscos para o mergullo ou o aparcamento de vehículos derivados das marés ou das características das praias, unha falla de empatía co patrimonio natural local (vgr as dunas ou os recursos marisqueiros, limitados na súa explotación aos profesionais autorizados pola Xunta, mais que non poucos desta caste tentan apañalos) e a mesma falla de empatía (derivada moitas veces dunha actitude abertamente supremacista) a respecto da lingua, toponimia e patrimonio cultural galego. Tamén, ultimamente, pola actitude destes residentes a respecto dos prezos (“que tienes gratis de pincho”, “¿no invitas al chupito”) e dos horarios da hostalería galega, semellando ás veces non dar entendido cousa tan sinxela como que a cociña peche ás 15.15 e o comedor ás 16.00.
O agravamento deste fenómeno ten a ver i) co incremento do turismo despois da pandemia, ii) coa actitude de milleiros de cidadáns da Meseta, nomeadamente da rexión madrileña, que viñeron ás carreiras ás súas segundas residencias para se pechar na pandemia, pondo en evidente risco ás nosas poboacións locais por mor da moi distinta situación epidemiolóxica, na altura (marzo de 2020), de Madrid e Galicia e iii) co divorcio absoluto, fomentado polas forzas políticas e sociais e media estatais, de millóns de cidadáns españois a respecto das linguas do Estado distintas do castelán, instrumentos de comunicación para os que as usamos e para eles algo que só serve para amolalos.
Chegaría para solucionar este problema de convivencia que os fodechinchos, que malia numerosos seguen as ser minoritarios entre o turismo que ven de determinados territorios, olle para a conduta da maioría dos seus propios paisanos e actúe en termos de prudencia co territorio, respecto polas persoas residentes e empatía coa nosa língua e patrimonio cultural e natural, Neste senso, a solución (o turismo responsábel) vale para os fodechinchos e tamén para aliviarmos a saturación turística.
A proba, organizada polo CP Altrúan, reuniu máis de 130 palistas dos seis clubs lucenses de augas tranquilas que participan na competición: o propio Altruán, o CD San Ciprián, o Club Kayak Foz, o CP Viveiro Urban Hotel, o Cidade de Lugo e o Club Fluvial de Lugo. O deputado de Mocidade Daniel García entregou os premios da proba, na que Club Fluvial de Lugo, Cidade de Lugo e Altruán coparon o podio por equipos. A Copa Deputación de Piraguismo, que conta de 6 regatas, organízase no marco da colaboración que a Vicepresidencia da Deputación de Lugo mantén coa Federación Galega de Piragüismo para a promoción deste deporte, ofrecendo aos clubs a posibilidade de participar en competicións federadas nas súas comarcas e contribuíndo así á consolidación de equipos de base.
Malia a intensa calor, o pavillón encheuse de público para gozar das actuacións das numerosas alumnas, que ofreceron exercicios individuais, por parellas e en grupo, destacando pola súa beleza e dificultade técnica ao ritmo da música escollida. Ao remate, a concelleira Ana Rubal entregou medallas ás participantes, que tamén agradeceron o traballo e os valores transmitidos pola súa monitora, Lorena Fernández. Lémbrase que a festa de clausura das Escolas Deportivas terá lugar o luns 29 ás 19:00 horas, nun acto conxunto co Concello de Alfoz, no que haberá diversas actividades de celebración e a entrega de diplomas.
A cantante e instrumentista asturiana Mónica Acevedo actuará en formato solista, mentres que o equipo do local ofrecerá un menú especial con pratos como o tartar de xarda, gañador do “Ribadeo Sabe”, gazpachuelo de tempada, lomo de sardiña con berenxena afumada, cóctel de lagostinos, bonito de Burela con melocotón asado e sopa de cebola, e solombo de porco celta con xudías tenras. A cita comeza ás 21:15, con prazas limitadas e reserva imprescindible.
A xornada incluíu tamén o IV Torneo de Pádel, que continuará durante a fin de semana. O evento, organizado polo Concello xunto con ASAPA e Miño Vivo e coa colaboración da Xunta, recupera unha iniciativa nacida hai catro anos a petición da mocidade, coa intención de consolidala no tempo. O tenente de alcalde, Marcos García Lombardero, destacou a alta participación —catro veces maior ca na primeira edición— e agradeceu a implicación de entidades, colaboradores e asistentes, así como a presenza de representantes da Xunta, do Parlamento e da Deputación.
Adultos, nenos, familias, grupos de amizades fixeron o percorrido nun día espectacular de sol e cunha temperatura de 26º á hora da saída. Acudiron á cita o presidente provincial da AECC, José Manuel Rozas, o alcalde de Ribadeo, Dani Vega, as concelleiras e concelleiro ribadenses, Marta Saiz, Begoña Sanjurjo, Elena Sierra e Francisco José Silvent, a presidenta e o xerente de Acisa, Carmen Cruzado e Jesús Pérez, así como representantes da AECC de Ribadeo coa súa presidenta, Tea Martínez, á cabeza. A II Andaina Ribadeo en marcha contra o cancro contou co patrocinio de Solán e Acisa Ribadeo e coa colaboración do Concello de Ribadeo, Eroski e 2M.
A partir das 19:45 horas abrirán a xornada o Cuarteto Illa Pancha e Tradigalu, mentres que desde as 20:00 horas se poderán degustar hamburguesas á parrilla, bocadillos de panceta e chourizos asados. Xa pola noite, ás 21:30, tomarán o relevo Mi Rollo es el Rock, antes da tradicional fogueira de San Xoán, prevista para as 00:00 horas. A celebración, organizada por A Rebolaxe coa colaboración do Concello de Cervo e a Deputación de Lugo, inclúe tamén o sorteo dunha paleta de cocho e contará con aparcamento habilitado no Estanco da Praia do Torno.
Pasada a medianoite, un vehículo saíuse da vía na N-634. Como consecuencia do impacto, tres persoas resultaron feridas. Da asistencia sanitaria ocupáronse os profesionais de Urxencias Sanitarias de Galicia-061 e os axentes da Garda Civil de Tráfico da seguridade na vía. Os Bombeiros de Barreiros tamén acudiron, sen embargo, ningún dos feridos estaba atrapado.
