Empate laranxa moi traballado

Os palmesanos asediaron no primeiro tempo, pero os locais penalizaron os seus erros e marcharon dous goles arriba ao descanso

Burela, 9 de novembro, 2024. Un imperial Michal Kaluza volveu a ser o gran protagonista dun Pescados Rubén Burela que foi por diante durante moitos minutos no electrónico e realizou un auténtico exercicio de resistencia para sumar un bo punto (2-2) ante un Illes Balears Palma Futsal que dominou e dispuxo de numerosas ocasións, pero o bicampión da Champions e da Copa Intercontinental estrelouse case sempre co muro polaco, que mesmo detivo un penalti.

O primeiro tempo foi un asedio constante do Illes Balears Palma Futsal, pero o Pescados Rubén Burela foi resiliente e penalizou moito aos palmesanos nos seus, practicamente, dous únicos erros da primeira metade, índose ao descanso cun esperanzador 2-0. En ambos os casos, os goles chegaron en senllas incursións de Luan Muller en campo contrario que aproveitaron moi ben Alberto e Isma.

Cada equipo dispuxo dunha ocasión no primeiro minuto. O visitante Neguinho resolvía cun remate moi alto un bo balón ao segundo pau nunha acción de estratexia á que respondía rápido o local Malaguti cun disparo raso desde a distancia á saída dun córner que taponaba Luan Muller.

A partir de aquí, todas as ocasións foron baleares ata que no minuto 15 se adiantaba a escadra local. Kaluza tiña que volver sacar as mans ante Neguinho no minuto 3 e na seguinte acción, nunha gran parede entre o propio Neguinho e Machado, este último finalizaba cun disparo que se ía moi preto do pau esquerda da portería defendida polo internacional polaco.

Dous minutos máis tarde Kaluza volvía meter as mans nun tiro de Ernesto e o asedio do conxunto insular diminuía un pouco, aínda que seguía monopolizando a posesión. Non sería ata o 13 cando volverían probar a un inconmensurable Kaluza. Nesta ocasión tiña que sacar un moi ben pé abaixo ante un lanzamento de Maia e repetía pouco despois diante de Bruno Gomes, nun balón que quedou morto na frontal e ante o que se fixo moi grande o meta dos mariñáns.

Outro bo pé de Kaluza nun contragolpe que remataba moi apurado Ernesto sería o preludio do primeiro tanto local. Nunha das múltiples subidas ao ataque de Luan Muller, ao de São Paulo marchábaselle un control e iso era moi ben aproveitado por Alberto para marcar desde o medio do campo a porta baleira.

Neguinho e Machado volvérono tentar antes do descanso, atopándose en ambas as ocasións co meta burelista, pero serían os locais os que terminarían marcando xa no último minuto de xogo do primeiro tempo. Luan Muller probaba un lanzamento desde a distancia que tocaba nun futbolista mariñao e caíalle a Isma perfecta para tentalo desde campo propio. O da Fonsagrada conectaba un disparo certeiro e subía o 2-0 ao electrónico, resultado co que se chegaba ao descanso.

Segundo tempo

O inicio do segundo tempo seguiu un guion similar, cos baleares buscando con afán reducir distancias e un Kaluza omnipresente ante cada intento dos de Antonio Vadillo. A primeira ocasión dos visitantes foi un penalti tras un agarrón de Araya sobre Bruno Gomes. O brasileiro sería o encargado de lanzalo, Kaluza acertaba as súas intencións e o cadro burelés seguía con dous goles de vantaxe, aínda que na acción seguinte de novo Bruno Gomes tiña unha ocasión clarísima, pero o seu remate a porta baleira íase ao traveseiro. Probaríao nesa mesma xogada de chilena, pero tampouco atopaba o camiño das mallas da portería local.

O penalti espoleou aos locais, que aumentaron a súa presenza na área contraria con respecto ao primeiro tempo e foron mesmo mellores durante algún tramo. Malaguti, cun disparo á media volta que se ía á cruceta, tivo o terceiro e logo tentouno Juninho nun balón que recuperara Isma no centro do campo, pero o lanzamento do brasileiro íase desviado.

No minuto 25 conseguían o premio á súa insistencia os palmesanos e subían o primeiro ao seu casilleiro por mediación de Ernesto tras unha boa triangulación con Bruno Gomes e Gordillo. O gol non desencaixou aos locais, que responderon cun remate moi alto de Rikelme tras recibir un balón filtrado por Alberto. O brasileiro tiña a seguinte cunha cabalgada pola á dereita que terminaba cun tiro ao lateral da rede.

Unha estratosférica parada de Kaluza nunha acción de pivot de Bruno Gomes era o preludio de catro boas oportunidades para facer o 3-1 dos locais. Na primeira Charly finalizaba lixeiramente desviado tras unha boa acción de Malaguti. Na segunda Alberto roubaba un balón e no man a man ante Luan Muller remataba ao peito do brasileiro. A terceira viña a través dun remate de Rikelme e a cuarta era outra gran opción nun balón cedido por Isma para que Charly rematase rozando o pau.

Ao mellor momento dos locais no partido respondían os baleares co empate. Primeiro aparecía Kaluza para deter un dous contra un que finalizaba David Peña, pero xa nada podía facer no segundo penalti da mañá. Piqueras enganaba ao polaco e o 2-2 subía ao tenteador cando restaban cinco minutos para a conclusión.

No tramo final, Juninho tentábao cun zurdado tras baixar o balón co peito e Luan Muller voaba para desviar un balón que ía cara á escuadra da súa portería. Kaluza, ante Neguinho e Bruno Gomes, realizaba outras dúas grandes intervencións de mérito e o partido finalizaba con reparto de puntos.

Ficha Técnica Pescados Rubén Burela FS 2-2 Illes Balears Palma Futsal

Pescados Rubén Burela FS (2): Kaluza; Araya, Isma, Rikelme, Malaguti -quinteto inicial-, Charly, Quelle, Alberto, Juninho, Pitero e Meira.

Illes Balears Palma Futsal (2): Luan Muller; Ernesto, Marcelo, Neginho, Bruno Gomes -quinteto inicial-, Machado, Gordillo, Piqueras, Thierry, Nil Tent, Maia e David Peña.

Goles: 1-0, min. 15: Alberto. 2-0, min. 20: Isma. 2-1, min. 25: Ernesto. 2-2, min. 35: Piqueras, de penalti.

Árbitros: Cristian Cubero e Luis Manuel Manso (Colexio Madrileño). Amoestaron ao adestrador local, David Rial, así como a Araya, Malaguti e Isma. Polos visitantes viron a amarela Ernesto e Neguinho.

Incidencias: Encontro da quinta xornada da Primeira División masculina disputado no pavillón de Vista Alegre diante duns 1.000 espectadores. Gardouse un minuto de silencio pola memoria dos falecidos na DINA de Valencia e Albacete. Así mesmo, o conxunto local fíxolle o corredor de honra ao visitante para homenaxear polo seu recente título de campión da Copa Intercontinental.