A Mariña, 15 de novembro de 2024. Preto de 700 persoas participaron este ano nas actividades e obradoiros da Mancomunidade de Concellos da Mariña Lucense. As iniciativas desenvolvidas contribúen a desestacionalizar o turismo e a mellorar o coñecemento do territorio.
A fin de semana pasada remataba a campaña Outono na Mariña. Plans e Obradoiros con corazón, unha iniciativa que a Mancomunidade de Concellos da Mariña Lucense puxo en marcha coa colaboración da Xunta de Galicia e da Deputación de Lugo.
As dúas propostas, Plans e Obradoiros con Corazón, similares nos seus obxectivos pero á súa vez diferentes, perseguen a desestacionalización do turismo, promovendo escapadas e viaxes curtos de fin de semana a esta comarca durante o outono; así como ampliar e mellorar o coñecemento dos recursos do territorio por parte da poboación local.
Todo da man de actividades: rutas, visitas guiadas e obradoiros participativos que poñen en valor o diverso e rico patrimonio cultural e natural da Mariña da man de guías oficiais de turismo, axentes e artesáns locais; en definitiva anfitrións do territorio que explican e presentan ao público asistente o territorio coma ninguén mellor o pode facer.
O 80% das persoas enquisadas en ambas iniciativas manifestaron que, a raíz das actividades, fixeron uso dos servizos de hostalería, restauración e/ou comercio local. Estes aspectos reafirman a idoneidade desta campaña como dinamizadora da oferta artesanal e turística da Mariña.
A Mariña. Plans con corazón. 16 rutas e visitas guiadas
Esta iniciativa veu a ser a continuación de A Mariña en Ruta, un programa que nas súas catro edicións anteriores baixo ese nome veu colleitando xa moi bos resultados con cerca de 1.000 persoas que puideron desfrutar da oferta de actividades ecoturísticas organizadas pola Mancomunidade.
Neste 2024 renovouse introducindo novidades e adaptando a súa identidade e nome á nova imaxe de marca turística da Mariña. Foron programadas un total de 16 rutas e visitas guiadas, que se realizaron nos 16 concellos que conforman o xeodestino da Mariña, a partir das propostas realizadas polos guías oficiais de turismo Ana Pena, Boris Vilar, Carmen Delia e Noela Feal, coa participación dunha serie de axentes e anfitrións, que colaboraron coa empresa especializada en ecoturismo Volta Montana, encargada da organización xunto á Mancomunidade. O resultado foi un proxecto que mantén os atributos que quere destacar a Mariña como destino diferente, próximo, aberto, amable e atractivo, un territorio que se conceptualiza no novo lema A Mariña. Galicia de Corazón.
O renovado programa Plans con Corazón, que se desenvolveu durante as fins de semana e tamén os festivos do 12 de outubro e do 1 de novembro, ata o 10 de novembro contou coa participación de 274 persoas procedentes de concellos da Mariña, da provincia de Lugo (Monforte de Lemos, Castro Riberas de Lea, Lugo, Vilalba, Xermade e Sarria), da Coruña (A Coruña, Oleiros, As Pontes, Santiago de Compostela e Touro), de Ourense (Ourense) ou Pontevedra (A Estrada), Asturias (Tapia de Casariego, Oviedo, Siero e Laviana) Madrid e Valladolid.
Desde a súa posta en marcha, o programa de rutas e visitas guiadas, conta cun elevado grado de aceptación e satisfacción, considerando novamente nesta edición o 100% dos enquisados que responderon á enquisa, que o programa debería ter continuidade no tempo, que dinamiza a oferta turística da Mariña Lucense e que recomendaría a experiencia a outra persoa. A valoración xeral da iniciativa foi de 9,7 (sendo o ano pasado de 9,2) sobre un máximo de dez, as puntuacións medias para as rutas foron de 9,5 (sendo o ano pasado de 9), a do guía de 9,6 (sendo o ano pasado de 9,3) e a organización 9,5 (sendo o ano pasado de 9,3).
A Mariña. Obradoiros con corazón, creativos e participativos con artesáns
Neste caso tratouse dunha nova iniciativa da Mancomunidade destinada a xerar un novo programa de posta en valor da actividade artesanal no destino mediante a creación de experiencias inmersivas que acheguen ás persoas visitantes e á poboación local á rica tradición artesanal da comarca.
O programa levouse a cabo os días 31 de outubro, 2, 3, 9 e 10 de novembro como unha primeira experiencia piloto e congregou durante 6 citas distintas a 62 persoas procedentes de concellos da Mariña, da provincia de Lugo (Pantón), da Coruña (Mugardos, Camariñas), Asturias (Navia, Tapia ou Cadavedo) ou de Luxemburgo.
O 100% dos artesáns/sás participantes (6 de distintas artes e localizacións no xeodestino) consideran que o programa debería ter continuidade no tempo, e repetirían a experiencia noutras ocasións, valorando todos eles a iniciativa de xeito moi positivo.
As persoas participantes nos obradoiros tamén amosaron unha elevada satisfacción co programa. Así o 100% das persoas enquisadas considera que o programa debería ter continuidade no tempo, sinalando que repetirían a experiencia e/ou a recomendarían a outra persoa. A valoración xeral da iniciativa, das actividades e das explicacións dos artesáns/sás foi de 9,8 e a organización da actividade e a xestión das reservas obtivo unha valoración de 9,4.
Entre os motivos principais sinalados para a súa participación no programa encóntranse a temática (72% das respostas) e o carácter participativo e creativo dos obradoiros (68%). Outros aspectos sinalados son a curiosidade (28%) ou polo seu carácter familiar-con nenos/as (24%), pois varios dos obradoiros programados posibilitaban a participación deste público.
Programa de xeoturismo
Un caso similar é o das actividades xeoturísticas que a mesma Mancomunidade poñía a andar a finais de decembro do pasado dentro dun Programa de Xeoturismo a cargo do Plan de Sostibilidade Turística, que cofinancia coa Xunta de Galicia e a Secretaría de Estado de Turismo.
Unha oferta que se pausaba na época álxida do verán para dar cabida á oferta que os Concellos da Mariña a nivel local ofrecen e remataba en setembro deste ano, para darlle paso aos Plans e Obradoiros con Corazón, gozando de gran acollida entre veciñanza e visitantes e incluíndo rutas e visitas xeolóxicas guiadas por xeólogos. Ademáis do Xeo Finde celebrado no mes de xuño, co que nenos e adultos se mergullaron no apaixoante mundo dos minerais e descubriron os segredos da terra.
Nas 22 actividades xeoturísticas que se desenvolveron a finais de decembro de 2023, xaneiro, febreiro, marzo, abril, maio, xuño, finais de agosto e no mes de setembro de 2024 participaron un total de 359 persoas procedentes de concellos da Mariña, da provincia de Lugo (Lugo, Monforte de Lemos, Castro Riberas de Lea, Navia de Suarna, Cospeito, Lugo, Vilalba, Castro de Rei), da Coruña (Arteixo, Ribeira, Milladoiro, A Coruña, Pontedeume, Ames, Narón, Oleiros, Mañón, Miño, Valdoviño, Ferrol, As Pontes, Bergondo, Noia, Culleredo, Mugardos, Santiago de Compostela), de Ourense (Ourense, Barbadás) ou Pontevedra (Pontevedra, Vigo, Pontecesures), Asturias (Castropol, San Tirso de Abres, Vegadeo, Taramundi) e da Comunidade de Madrid.
Realizando unha análise xeral das enquisas de satisfacción recibidas para estas actividades foi posible coñecer que todos os participantes repetirían a experiencia, e un 100% cren que debería ter continuidade no tempo. A valoración xeral das actividades foi moi positiva cunha nota media de 9,3 puntos, sobre un máximo de 10. Ademais, as puntuacións medias para as explicacións dos guías foi de 9,8, a organización 9,4, e da iniciativa en xeral 9,7.
Adultos, nenos, familias, grupos de amizades fixeron o percorrido nun día espectacular de sol e cunha temperatura de 26º á hora da saída. Acudiron á cita o presidente provincial da AECC, José Manuel Rozas, o alcalde de Ribadeo, Dani Vega, as concelleiras e concelleiro ribadenses, Marta Saiz, Begoña Sanjurjo, Elena Sierra e Francisco José Silvent, a presidenta e o xerente de Acisa, Carmen Cruzado e Jesús Pérez, así como representantes da AECC de Ribadeo coa súa presidenta, Tea Martínez, á cabeza. A II Andaina Ribadeo en marcha contra o cancro contou co patrocinio de Solán e Acisa Ribadeo e coa colaboración do Concello de Ribadeo, Eroski e 2M.
A xornada incluíu tamén o IV Torneo de Pádel, que continuará durante a fin de semana. O evento, organizado polo Concello xunto con ASAPA e Miño Vivo e coa colaboración da Xunta, recupera unha iniciativa nacida hai catro anos a petición da mocidade, coa intención de consolidala no tempo. O tenente de alcalde, Marcos García Lombardero, destacou a alta participación —catro veces maior ca na primeira edición— e agradeceu a implicación de entidades, colaboradores e asistentes, así como a presenza de representantes da Xunta, do Parlamento e da Deputación.
Pasada a medianoite, un vehículo saíuse da vía na N-634. Como consecuencia do impacto, tres persoas resultaron feridas. Da asistencia sanitaria ocupáronse os profesionais de Urxencias Sanitarias de Galicia-061 e os axentes da Garda Civil de Tráfico da seguridade na vía. Os Bombeiros de Barreiros tamén acudiron, sen embargo, ningún dos feridos estaba atrapado.
Baixo o título “A guerra en Oriente Medio. Do xenocidio en Palestina á agresión a Irán”, o analista internacional Duarte Correa ofrecerá unha intervención centrada na evolución do conflito, o impacto humanitario e as implicacións xeopolíticas da escalada bélica na rexión.
A proba, organizada polo CP Altrúan, reunirá 137palistas dos seis clubs lucenses de augas tranquilas que participan na competición: o propio Altruán, o CD San Ciprián, o Club Kayak Foz, o CP Viveiro Urban Hotel, o Cidade de Lugo e o Club Fluvial de Lugo. O deputado de Mocidade Daniel García achegouse esta tarde a Ribadeo para presentar a proba, que comezará ás 15.30 coa saída dos prebenxamíns e benxamíns. A continuación e de forma escalonada, desenvolveranse as probas das categorías infantil, alevín e cadete e xuvenil.
A partir das 19:45 horas abrirán a xornada o Cuarteto Illa Pancha e Tradigalu, mentres que desde as 20:00 horas se poderán degustar hamburguesas á parrilla, bocadillos de panceta e chourizos asados. Xa pola noite, ás 21:30, tomarán o relevo Mi Rollo es el Rock, antes da tradicional fogueira de San Xoán, prevista para as 00:00 horas. A celebración, organizada por A Rebolaxe coa colaboración do Concello de Cervo e a Deputación de Lugo, inclúe tamén o sorteo dunha paleta de cocho e contará con aparcamento habilitado no Estanco da Praia do Torno.
A Garda Civil de Burela tomou declaración este 10 de xuño a unha representante do departamento en liña de Porcelana de Sargadelos, que denunciou unha estafa na que se emprega a imaxe da empresa para enganar clientes. Segundo explicou, desde finais de abril están a aparecer páxinas web falsas con descontos do 80% e perfís fraudulentos en redes sociais como Instagram, TikTok e Facebook, a través dos que varios usuarios xa foron estafados. A compañía presentou denuncias contra distintos dominios e contas, das que só unha continúa activa, e achegou tamén os rexistros da marca e as comunicacións realizadas ante Meta. A denuncia foi formalizada no cuartel da Garda Civil de Burela, onde quedou incorporada ás dilixencias abertas polo corpo.
