O PP insta ao alcalde a “reconsiderar a súa proposta para manter reunións para abordar temas de interese para Muras e os veciños”

Os populares insisten en pedir “máis diálogo” nos asuntos importantes do municipio toda vez que “o goberno do BNG se atopa en minoría”

Muras, 30 de abril de 2025. O PP de Muras reitera ao alcalde que “reconsidere” a proposta para manter reunións co Grupo Municipal Popular para abordar temas de interese para o municipio e os seus veciños e veciñas.
Os concelleiros do Partido Popular defenden que “podemos aportar ideas para asuntos importantes para os veciños e veciñas” e, ademais, cren que “o alcalde ten que dar explicacións sobre a súa xestión, dialogar e buscar puntos de acordo co resto dos grupos” toda vez que “o goberno do BNG se atopa en minoría”.

Polo tanto, solicitan formalmente que “o alcalde poña data, canto antes, a unha reunión co Grupo Municipal Popular para abordar, entre outros temas, ideas para impulsar as feiras e eventos anuais que se celebran no noso municipio” como a Feira do Poldro, a Feira do Mel ou a Romaxe Artesá que “precisan un xiro importante”.
Tamén urxen que o goberno local abone as axudas municipais a tódalas asociacións do concello, “incluíndo as sociedades de cazadores e a ANPA”, segundo puntualizan.

Os populares xa pediran no Pleno anterior que “o alcalde dea máis explicacións no que queda de mandato. O que pedimos é máis diálogo”, aclaran os concelleiros que pretenden “defender e apoiar aos nosos veciños e veciñas”.

Nese sentido, teñen anunciado a súa proposta para absterse na votación sobre o pago de facturas a provedores. “É a fórmula para favorecer que os autónomos e pequenas empresas cobren polo seu traballo”, explican.

Con todo, aclaran que “non podemos votar a favor” porque “non compartimos a mala xestión económica do alcalde nacionalista”. Algunhas das irregularidades das que teñen advertido en varias ocasións son: facturas que se corresponden con “servizos encargos a dedo” cando se deberían “sacar a concurso público” como recolle a Lei de Contratos do Sector Público ou o fraccionamento de facturas. No caso do pago polo inventario de bens municipais, a proposta do goberno foi “fraccionalo en tres facturas” cando “a Administración non pode fragmentar facturas por un mesmo traballo”.

A portavoz, Eugenia Requeijo, explica que “se acumulan facturas sen pagar” porque o goberno local “non tiña previsto partidas orzamentarias para estes gastos. Se tivera ben deseñado o orzamento e aprobado tódolos anos este instrumento básico para a xestión económica de calquera Concello, disporía de partidas orzamentarias suficientes para pagar as facturas”.