A conselleira de Política Social e Igualdade, Fabiola García, anuncia que a Xunta cederá ao concello de Foz a propiedade do inmoble da residencia de maiores

Nestes momentos estase a tramitar o expediente para a transmisión definitiva da titularidade do edificio

Santiago de Compostela, 21 de maio de 2025. A Xunta completará nos vindeiros meses a tramitación do expediente para a transmisión definitiva ao concello de Foz da propiedade do inmoble da residencia municipal. Así o indicou a conselleira de Política Social e Igualdade, Fabiola Garcia, nunha intervención no Pleno do Parlamento de Galicia na que deu conta da situación deste centro residencial.

Fabiola García explicou que o traspaso da titularidade do edificio foi acordado no seu día coa Administración local, polo que nuns meses este será integramente de propiedade municipal. Ademais, sinalou que a residencia é de xestión municipal porque así o decidiu o Concello para dar prioridade aos veciños de Foz, o que non sería posible se fora de xestión autonómica.

A conselleira manifestou que a Xunta seguirá traballando man con man con todos os concellos galegos na mellora da atención ás persoas maiores e para levar os servizos a todos os recunchos de Galicia. Neste sentido, destacou ás máis de 16.700 prazas públicas de atención residencial coas que hoxe conta a nosa comunidade, o triplo das que existían en 2009; as axudas directas de 5.000 euros anuais que se conceden a través do Bono Coidado no Fogar ou as casas do maior, servizos de atención diúrna que garanten unha atención personalizada, de proximidade e gratuíta nos concellos pequenos e de carácter rural.

Ademais, Fabiola García sinalou que o Executivo autonómico continuará avanzando nesta dirección coa posta en marcha do plan de residencias máis ambicioso da historia, con 24 novas en toda a comunidade que sumarán 1.800 prazas.