A subdelegada presidiu a Xunta coa participación dos distintos axentes dos corpos e forzas que colaboran na seguridade dos festexos, que rematarán o vindeiro 3 de xuño
Lugo, 26 de maio de 2025. A subdelegada do Goberno en Lugo, Isabel Rodríguez, presidiu hoxe no Concello de Burela a Xunta Local de Seguridade co fin de coordinar as medidas necesarias para garantir o correcto desenvolvemento das festas patronais que están a celebrarse ata o martes 3 de xuño, así como doutros eventos previstos durante o verán.
Durante a reunión, na que estivo presente a alcaldesa e representantes da Garda Civil, subsector de Tráfico, Emerxencias e Policía Local, así como membros do goberno municipal, tamén se abordou a situación de seguridade cidadá, confirmando que no 2024 mantívose unha baixa taxa de criminalidade, cunha media de 27,65 delitos por cada 1.000 habitantes.
Ademais, dentro do Plan Director para a convivencia e mellora da seguridade escolar nos centros educativos e as súas contornas impartíronse, coa colaboración da Garda Civil, 38 conferencias nos colexios do municipio sobre ciberacoso, violencia machista ou adicións.
No relativo á violencia de xénero, a cifra de denuncias durante o 2024 en Burela foi de 9, e actualmente hai 32 casos activos rexistrados no concello dentro do sistema VioGén.
Isabel Rodríguez destacou o firme compromiso do Goberno de España co desenvolvemento de políticas de igualdade e o impulso da loita colectiva contra a violencia de xénero.
A subdelegada agradeceu o labor das forzas e corpos polo seu compromiso coa seguridade cidadá e destacou o traballo do Concello na promoción de festas e actividades que poñen en valor o patrimonio cultural da provincia.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
