O PP de Lourenzá urxe ao goberno local a “pagar os atrasos ás traballadoras do SAF” e “garantir a atención aos usuarios”

Os populares recoñecen “o importante labor das traballadoras, como é o coidado dos nosos maiores e que debe ser unha prioridade”

Lourenzá, 29 de maio de 2025. O Partido Popular de Lourenzá amosa a súa “solidariedade” coas traballadoras do Servizo de Axuda no Fogar (SAF) e recoñece o seu “importante labor como é a atención aos nosos maiores”.

Os populares urxen ao goberno local socialista a adoptar as medidas necesarias “poñer ao día” os pagos ás traballadoras abonando os atrasos dos anos 2022 e 2023 e, “por suposto, garantir a atención aos maiores” que “debe ser unha prioridade para o goberno local”.

Os concelleiros do PP lembran que “xa temos advertido no Pleno da situación das traballadoras do SAF que se prolonga dende fai máis de dous anos”. Ademais dos atrasos, “o goberno local négase a subir o salario en relación ao incremento do IPC como lles corresponde e tamén a cumprir coa obrigatoriedade de facer un contrato indefinido a unha empregada que ten pasado todos os exames necesarios e leva moitos anos traballando no Concello acumulando contratos temporais”.

Os populares condenan a situación derivada da “falta de xestión do goberno municipal” e lamentan que “a falta de solucións se atrasara tanto que as traballadoras tiveron que chegar a anunciar unha folga”. Nese sentido, sinalan que “non se recorda en Lourenzá ningunha folga de traballadores do Concello”.

Os concelleiros do Partido Popular agardan que sexa posible “chegar a acordos para desbloquear a situación” e “evitar prexuízos tanto ás traballadoras coma aos usuarios do SAF”.