Presentación de “A voz do mosquito” en Ribadeo

Ribadeo, 8 de maio, 2025. Este xoves a A.C. Francisco Lanza organizou a presentación de “A voz do mosquito”, de Francisco García Novio, na Biblioteca Municipal El Viejo Pancho, de Ribadeo. Durante unha hora púidose dialogar co autor acerca deste seu conxunto de relatos que abordan o misterio, o amor e o desamor, cousas diversas da vida e algo de costumismo.

Francisco García Novio comentou que, para escribir, el parte de feitos xa ocorridos, a partir dos cales recrea unha historia. Confesou que o aspecto máis complexo da faceta creativa é darlle estrutura ao relato, ir formando con dita historia inicial uns vimbios que conformen o cesto no que repousan as vivencias alí plasmadas. Mesmo confesou unha experiencia recente que de seguro ha dar lugar a novas historias, pois foi de tal intensidade, que aínda hoxe a evocaba con verbo apaixonado.

Lembrou aos amigos de Órrea, nomeadamente Carlos Veiga, que presentaron o seu documental “De sol a sol. Segadores de Órrea en Castela”, pois unha das historias de “A voz do mosquito” ten como pano de fondo a experiencia dos galegos que se achegaban pola meseta a facer os labores da sega. Esta historia, xunto con outras referidas ás relacións de parella, que evocan aspectos misteriosos ou escudriñan as cousas da vida cotián, ben merecen ser lidas e dadas a coñecer. Publicada pola Editorial Medulia: A voz do mosquito.

A A.C. Francisco Lanza agradece a asistencia ao acto: “todo o esforzo que realizamos para organizar estas actividades ten a súa debida recompensa coa vosa presenza. Non hai mellor premio nin maior gabanza”.