A Xunta colabora coa II Carreira e Andaina do concello da Pastoriza, que se celebra o 13 de xullo

O delegado territorial, Javier Arias, participou hoxe na presentación da proba, incluída no I Circuíto de Carreiras Populares da Terra Chá

A Pastoriza, 16 de xuño de 2025. A Xunta colabora coa II Carreira e Andaina organizada polo Concello da Pastoriza, que se celebra o próximo 13 de xullo. O delegado territorial, Javier Arias, e o alcalde do municipio, Darío Cabaneiro, presentaron esta mañá a proba, incluída no I Circuíto de Carreiras Populares da Terra Chá.

O prazo de inscrición está aberto ata o día 7 de xullo. Hai diferentes categorías e distancias en función das idades, dende os pitufos – nacidos a partir do 2018 – ata as persoas adultas.

A saída e a meta estarán na praza do Concello. A proba discorrerá principalmente por camiños de terra á beira do monte da contorna próxima á vila – arredor do 70% – , así como polas rúas da localidade. En canto á andaina, está aberta a todas as idades e terá un percorrido de 4,5 quilómetros.

Arias destacou que A Pastoriza “é o escenario idóneo para acoller unha carreira popular destas características”, que ofrece a oportunidade “de practicar exercicio físico ao aire libre nunha contorna natural privilexiada”, apuntou.