Convocada para o xoves, 12 de xuño, unha gran concentración diante do Hospital da Mariña

A Mariña 3 de xuño de 2025.A Plataforma Sanitaria da Mariña xunto co movemento En Defensa dxs Pacientes da Mariña e colectivos sanitarios locais como Médicxs en Vicedo Xa e Asociación do Casco Histórico de Viveiro veñen de presentar a que será unha gran concentración diante do hospital da Mariña.

A concentración terá lugar o xoves día 12 de xuño ás 20horas de xeito simultáneo a concentracións por todo o largo e ancho do país que están convocadas por SOS Sanidade Pública, macroplataforma que inclúe a todas as plataformas sanitarias de Galiza xunto con diversos colectivos e organizacións.

Un dos eixos da concentración expansiva centrarase nas “vergoñentas listas de agarda, que poñen en risco a nosa saúde e que é a desculpa perfecta para o desvío de gran parte dos cartos que deberían ser investidos na recuperación e dotación orzamentaria axeitada da sanidade pública. Neste sentido, reclamamos un exercicio de transparencia por parte da Xunta para a xestión das listas de espera, de xeito que sexan públicas na súa totalidade e con criterios tamén transparentes no que se refire ás prioridades”.

“Máis na Mariña levamos moitos anos anos sufrindo o abandono por parte do goberno da Xunta en canto a déficits de profesionais brutais que impiden poder garantir unha asistencia sanitaria como nos merecemos, á vez que se multiplican as derivacións cara a centros privados ou ao HULA para consultas, intervencións e procedementos diagnósticos que ben se poderían facer neste hospital. Estas prácticas, que degradaron ata límites insoportables a sanidade mariñá , disparáronse de xeito progresivo e exponencial desde a supresión da área Sanitaria da Mariña, no ano 2018”.

Para todos os colectivos que hoxe están loitando por unha sanidade digna, de calidade, de proximidade, equitativa e gratuíta na Mariña o centro das demandas e reivindicacións, a razón de se mobilizar sempre son as persoas, porque todas son pacientes. Absolutamente todas. É por iso que o lema desta concentración será “Pola Saúde d@s Pacientes da Mariña”.

Os colectivos que convocan a concentración queren tamén agradecer “a implicación a todxs xs profesionais e ás persoas que durante cerca de dous meses se estiveron a concentrar diariamente de xeito ininterrumpido. Esta loita logrou arranxar a modo de parche algunhas situacións que eran insostibles máis a loita debe continuar. por iso animamos atodas as mariñás e mariñaos a que acudan a esta concentración que agardamos sexa multitudinaria e logre mudar conciencias e vontade política”.