O PP lucense pon a SAT Rey de Miñotelo como exemplo da optimización do benestar animal no sector lácteo

Representantes da directiva provincial, local e de Novas Xeracións visitaron esta premiada granxa da Pastoriza

A Pastoriza, 10 de xuño de 2025. Unha comitiva do PP lucense achegouse á Pastoriza a coñecer a xovenca campioa de España de raza Frisona, Rey 1273 Haxl Bambi, e a súa “exemplar” explotación, SAT Rey de Miñotelo, da man de Alberto Iglesia.

O coordinador do PP lucense e senador José Manuel Balseiro, a secretaria da Área de Demografía do PP lucense, Sara Ruiz, a vicesecretaria de Acción Sectorial do PPdeG, Olga Iglesias, a deputada nacional Cristina Abades, o presidente, Marcos García Lombardero, e membros do PP local, o presidente de NNXX da provincia, Miguel Gallego, e integrantes da formación xuvenil participaron na visita co obxectivo de poñer en valor “algo tan emblemático do campo de Lugo e de España”.

“Queremos poñer o foco na forma de optimizar a produción animal ao benestar dos mesmos, á súa morfoloxía e beleza que repercuten positivamente nos animais. Isto afecta directamente ao futuro no noso gando e dunha gran industria láctea, ademais dos postos de traballo que xera ao seu redor”, subliña Ruiz.

A SAT Rey de Miñotelo, que ten logrado numerosos recoñecementos a nivel autonómico e nacional cos seus animais, é un exemplo da profesionalización do sector lácteo galego.