Deu luz verde na Xunta de Goberno a un convenio de colaboración co Concello de Foz para a renovación do céspede artificial do campo de fútbol de Malates; e con Burela para a instalación dunha cuberta que protexa parcialmente a praza da Mariña
Lugo, 24 de outubro de 2025. A Xunta de Goberno da Deputación de Lugo aprobou este venres investir 750.000€ na mellora de dotacións e servizos nas comarcas da Mariña e na Montaña. Así o informou a Voceira socialista, Pilar García Porto, que enmarcou a decisión tomada esta mañá na sesión semanal do Executivo no seu compromiso coa cooperación cos 67 concellos que conforman a provincia de Lugo.
Avanzou que na comarca da Mariña aprobaron dous convenios de colaboración con Foz e con Burela. En Foz a Deputación investirá 250.000€ para a renovación do céspede artificial no campo de Malates. “Unha instalación deportiva moi empregada tanto para partidos como para adestramentos por equipos locais e categorías inferiores”, explicou García Porto.
Sinalou que o céspede actual está “moi deteriorado” porque o instalaron no 2011, hai 14 anos, e ten moito uso e destacou que “a través destes fondos poderemos instalar un céspede artificial de última xeración e ademais renovar o sistema de rego”. Nese sentido, detallou que o Concello de Foz porá outros 65.071,39€ para chegar a un orzamento conxunto de 315.071,39€ necesarios para estas actuacións “que virán a mellorar a seguridade, a comodidade e as prestacións deste campo de fútbol”.
Valorou que renovar o céspede non é só unha mellora deportiva, “senón un investimento en benestar para o conxunto da veciñanza, porque grazas a esta actuación, Foz contará cunha instalación máis moderna e sostible, que potenciará a vida comunitaria”.
Praza da Mariña de Burela
En Burela, a Deputación destinará outros 250.000€ para a instalación dunha cuberta na praza da Mariña. Un espazo público ao aire libre “imprescindible para este municipio porque acolle gran variedade de usos: a recepción dos Reis Magos, eventos deportivos, xogos infantís, representacións de teatro, concertos, feiras e pequenos mercados”. Explicou a Deputada que mediante estes fondos “dotaremos a esta praza dunha zona cuberta de 400 metros cadrados, de costas ao antigo centro comercial; no lugar no que se sitúa o actual palco da música”.
O Concello de Burela aportará 122.670,30€ para chegar a un orzamento de 372.670,30€ necesarios para a instalación desta cuberta, que terá alturas variables, será de madeira e metal e estará dotada con lucernarios para deixar pasar a luz natural. “Gracias a esta actuación dotamos ó centro de Burela dun espazo útil ó aire libre os 365 días do ano, independentemente do tempo; xa que a estrutura que está proxectada protexería da choiva, pero tamén do nordés. “Un investimento que se traduce en cohesión social, actividade económica e sustentabilidade urbana”, destacou García Porto.
Melloras na Fonsagrada
Ademais a Xunta de Goberno aprobou para comarca da Montaña un investimento de 249.994,37€ para colaborar na rexeneración e dotación de servizos básicos no concello da Fonsagrada. Mediante este convenio a Deputación de Lugo financiará un total de 7 actuacións que afectarán ao centro urbano e a diferentes parroquias do sur do municipio.
No centro urbano da Fonsagrada estes fondos servirán para acondicionar o aparcamento da Avenida de Galicia, “unha das principais arterias urbanas da Fonsagrada polo tránsito que ten e na que a zona destinada a aparcar está moi deteriorada”. Tamén servirán para adecuar e renovar os servizos na rúa Marqués de Rodil, “outra das vías significativas do centro urbano deste concello porque dá servizo directo a residencias e establecementos comerciais”. Neste caso o investimento, detallou a responsable provincial, servirá para a renovación do abastecemento, o saneamento, a canalización das telecomunicacións ou mellora do alumeado.
No que ten que ver co rural do concello, estes fondos permitirán tamén mellorar o abastecemento de Aldobrén; no de Louxas; instalar unha cuberta nos depósitos de auga de Mazaeda e facer obras de reforzo e reconstrución dun muro en San Martín de Suarna.
“Son todas actuacións moi importantes para este concello, que é o máis extenso de Galicia -483,5 quilómetros cadrados- e que conta con máis de 600 quilómetros de vías asfaltados e 278 núcleos, polo que a súa poboación está moi dispersa e é complicado manter unha boa calidade dos servizos”, subliñou García Porto. “E ese é o noso compromiso coa cooperación cos concellos, axudar ós 67 concellos da nosa provincia para que poidan ofrecer máis e mellores servizos ós veciños e veciñas”, engadiu.
Maquinaria nova para o Parque Móbil
Licitada ademais a contratación para a adquisición dunha pala de cadeas, unha Bulldozer con coitela frontal e Ripper para o servizo do Parque Móbil. O prezo de contratación é de 393.250€ e o prazo de entrega será de 40 días naturais. “Este contrato permitirá dotar ao Parque Móbil dunha máquina e un accesorio imprescindibles no mantemento e rehabilitación de terreos, facilitando os traballos en obras e operacións de gran volume e en terreos difíciles”, relatou.
Polo tanto esta contratación virá a mellorar o servizo que ofrece o Parque Móbil da Deputación que repercutirá nas vías municipais de toda a provincia.
Este luns, 14 de setembro, visitaron Mondoñedo, a Praia das Catedrais e Santa Cruz. A viaxe evocou as lecturas de Cunqueiro e as súas Crónicas do sochantre, nun percorrido que incluíu a catedral mindoniense e o barrio dos Muíños, ademais da emblemática praia de Augas Santas. Pola tarde participaron nunha exhibición de billarda grazas á estimable colaboración dos billardeiros da comarca. O martes partirán de regreso a Loktudi.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Este luns, 14 de setembro, deu comezo un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
A programación arrancará de 13:00 a 15:00 horas cos pinchos de benvida e unha sesión vermú a cargo do DJ Peabody. A continuación, de 15:00 a 17:00 horas, terá lugar a comida na Finca San Antonio, cun menú composto por salpicón de rape e langostinos, codillo con patacas, pan, postre, café, chupito e bebida incluída. Os tickets teñen un prezo de 40 euros e poden adquirirse en O Rincón, Confitería Alianza, Comercial Anjor e Perruquería Oriola; os menores de 5 anos asistirán de balde e os de 6 a 10 anos contan cun desconto do 50 %. Xa a partires das 18.30 horas haberá sesión de música con Toxo Guayaba.
