A piscina municipal de Viveiro conta con novas máquinas “grazas ó convenio xestionado polo anterior goberno socialista”

Viveiro, 14 de outubro, 2025. O PSOE de Viveiro informa: “Hoxe procedeuse a recepción das máquinas do ximnasio da Piscina Municipal. Queremos lembrar que todas as melloras que se fixeron na piscina estes últimos meses son froito directo da xestión do anterior goberno socialista, encabezado pola ex alcaldesa María Loureiro, que traballaou en colaboración coa Deputación de Lugo para mellorar as instalacións deportivas municipais”.

“Durante o anterior goberno, asinouse un convenio de 50.000 para a renovación integral das máquinas do ximnasio, un proxecto xestionado e tramitado polo goberno socialista, que hoxe vémolo materializado coa recepción das novas máquinas”.

“Estas actuacións súmanse á instalación dunha nova deshumefectadora, tamén financiada pola Deputación de Lugo por un importe de 37.279,52 euros. Grazas á cal se puido abrir o vaso pequeno da piscina, mellorando así as condicións de seguridade e hixiene da instalación”.

“Trátase, en conxunto, de obras de mellora herdadas do anterior goberno socialista, que demostran que o executivo de María Loureiro non estaba de brazos cruzados, senón traballando día a día para mellorar Viveiro, a pesar das dificultades económicas e da falta absoluta e total de apoio da Xunta de Galicia, que para Viveiro non parecía existir”.

“O tempo unha vez máis pon as cousas no seu lugar”, sinalan dende o PSOE. “Agora queda demostrado que, mentres o Partido Popular e Por Viveiro criticaban sen fundamento, acusando ó goberno socialista de desidia; o noso goberno seguía xestionando, mellorando servizos e conseguindo investimentos para o municipio. As obras que se están facendo e as que se farán en breve son froito dese traballo serio e constante”.