Adxudicadas as obras na Ponte do Arco en Masma, Mondoñedo, cun investimento de máis de 48.000€ achegados pola Xunta

As obras inclúen actuacións previas no encauzamento do río para illar o piar e non afectar á calidade das augas e a intervención para fixar a cachotería e restaurar por medios manuais con pedra natural e un acabado acorde á tipoloxía tradicional e coas mesmas características que a orixinal

Mondoñedo, a 15 de outubro de 2025. O Concello de Mondoñedo vén de adxudicar as obras para a reparación do piar da Ponte do Arco, en Masma, por un importe superior aos 48.000 € (48.393,95 €) que serán achegados pola Xunta de Galicia a través dun convenio coa Axencia Galega de Desenvolvemento Rural (AGADER) para a concesión dunha subvención directa para este proxecto senlleiro de promoción e posta en valor do patrimonio histórico da comarca.

O piar da ponte presenta un deterioro que pode afectar significativamente á estrutura da ponte e, polo tanto, supón un risco para o tránsito. Así, “é moi importante a reparación urxente desta edificación histórica que reflicte unha gran riqueza cultural para evitar maiores danos”.

O equipo de goberno subliña que “esta obra se leva a cabo despois de moito traballo por parte do Concello e grazas á colaboración da Xunta de Galicia e á súa vontade para dialogar e ofrecer solucións aos problemas dos nosos veciños”.

ACTUACIÓNS

As actuacións previstas inclúen previamente o encauzamento do río para illar o piar sen que as obras afecten á calidade das augas. E, en canto ás actuacións no propio piar, contémplase fixar a obra de cachotería e restaurar o corpo do piar por medios manuais, mediante pedra natural e outros materiais para minimizar o impacto visual e cun acabado acorde á tipoloxía tradicional e coas mesmas características que a orixinal.