O BNG pediu á Xunta respostas claras e inmediatas á falta de información das ganderías en relación coa dermatose nodular

Daniel García criticou a xestión da Consellería, que establece medidas parciais e tardías

Lugo, 28 de outubro de 2025. O deputado provincial Daniel García esixiu á Xunta de Galicia respostas claras e inmediatas á falta de información das ganderías en relación coa dermatose nodular, tras as medidas cautelares respecto ao movemento de animais decretado onte pola Consellería de Medio Rural.

No pleno celebrado esta mañá na Deputación, Daniel García criticou que as medidas chegan “con tres semanas de retraso respecto da detección do primeiro foco no Estado” e que “se siga permitindo a entrada para vida de zonas como Zaragoza ou Valencia, centros de concentración de vacún de recría”.

O responsable provincial advertiu tamén dos interrogantes que deixa o decreto da Consellería: “Quen vai asumir as perdas ocasionadas pola imposibilidade de venta dos animais ou o custe de indemnización do sacrificio por baleirado sanitario nas granxas afectadas?, como se van a xestionar os animais mortos? Ou como se vai realizar a xestión e control por parte da administración coas Oficinas Agrarias con falta de persoal e en pleno concurso de traslados?”.

Neste sentido, o deputado criticou que ningunha destas cuestións se aclarou onte, na primeira xuntanza realizada pola Consellería sobre a extensión da dermatose nodular. “Durante o encontro, a Consellería limitouse a asegurar que todo se fixera correctamente, sinalando que se as persoas gandeiras non están informadas, é porque non queren. Seguen a mesma estratexia que no caso da Língua Azul, delegar as competencias e responsabilidades nos propios gandeiros e gandeiras e botar balóns fóra cando existen competencias propias na materia”.

“A obriga da administración, especialmente nestes casos, é proporcionar información clara e rigorosa, e non deixar que circulen datos confusos que xeran máis incerteza entre as gandeiras e gandeiros”, reclamou o deputado, fronte á xestión do goberno galego que “se limita a reenviar as publicacións do Ministerio”, concluíu.