No ano 2000 os gobernos do o PP no Estado e na Xunta, decidiron que a Autovía do Cantábrico ao chegar a Galiza (a A-8), deixase de ir precisamente polo Cantábrico e, fose polo Fiouco, ese “gran acerto” no traxecto, polo que a Autovía do Cantábrico desviouse por Vilalba que, como todo o mundo sabe, é unha vila mariñeira e, xa que logo, cantábrica; e de Vilalba a Baamonde para enlazar coa A6 e tamén coa AP-9 e, como última etapa, chegar a Compostela.
Nese momento, xuño do ano 2000, o Delegado do Goberno, por suposto do PP, explicounos que o desvío por Vilalba era o mellor (está na hemeroteca), aínda máis, considerou que unha vía rápida entre Barreiros e Ferrol era a mellor opción para Galiza, e xa postos a dicir estupideces, tamén dixo que a autovía pola costa non ía cubrir as necesidades da Mariña. E todo este disparate foi aplaudido polas alcaldías do PP, entre elas a de Viveiro. A resposta social foi manifestacións en Ferrol, Ortigueira e Viveiro, mesmo no caso de Viveiro, con asembleas de cargos públicos das dúas comarcas, a Mariña e Ferrolterra, no propio Viveiro onde non asistiu o seu alcalde. Iso foi hai 25 anos.
Mais as protestas sociais sempre obrigan, queiran ou non, a unha resposta das administracións, aínda que logo as respostas sexan mentira; de feito, no ano 2003, e sendo Conselleiro de Política Territorial o señor Núñez Feixóo, anunciou, xunto do alcalde do PP de Viveiro, que a variante de Viveiro sería o primeiro tramo a vía rápida Barreiros-Ferrol, pasaron 22 anos dese anuncio.
Chegou o Bipartito ao goberno da Xunta no ano 2005, estivo até o ano 2009, neses catro anos licitou os dous únicos tramos do que no ano 2000 o PP anunciara como o corredor da costa (VAC), foron a circunvalación de Ortigueira e o tramo Viveiro-Xove, os únicos que aínda hoxe existen.
Coa volta do PP á Xunta, tivemos novos anuncios, tamén recollidos na hemeroteca; a finais do 2009, o Conselleiro de Política Territorial comprometeuse a que o corredor da costa ía estar rematado, na súa totalidade, no 2017. O mesmo anuncio fixo formalmente o presidente da Xunta, Núñez Feixóo, en sede parlamentar no 2011.
Mais pasaron os anos, moitos xa dende o ano 2000 e no conxunto da Mariña-Ortegal pouco mudaron as infraestruturas. A verdade é que o PP non precisou nunca de facer un esforzo nestas comarcas, ten votos dabondo e, por iso, para que facer investimentos; aínda máis, no caso de Viveiro, se non chegan os votos hai unha moción de censura, mesmo apoiada polos que, supostamente, representaban outras políticas.
O das infraestruturas na Mariña non é un caso único, poderíamos falar da Área Sanitaria roubada ou do deserto industrial, semella que é un territorio só para o turismo e o que queda da pesca.
Estes días o presidente da Xunta vén de anunciar unha alternativa nova para Viveiro, unha estrada convencional entre Celeiro e Magazos, precisamente ao pé do Monte San Roque; xa nin autovía, nin VAC, só unha estrada convencional, a empezar no 2028, sen data de remate e sen ningún anuncio novo sobre unha alternativa para Covas; van sobrados, pouco a pouco, ano a ano, van minguando as súas propias promesas, poderían rematar anunciando unha corredoira, tanto ten, a súa política é deteriorar tanto as expectativas que, ao final, calquera cousa que fagan é positiva, dito popularmente, mellor isto que nada, así nos vai; vaia desastre.
Poucos días despois de anunciar esta nova corredoira en Viveiro, o mesmo presidente da Xunta, o señor Rueda, informounos de que a última fase das obras da autovía Lugo-Sarria comezarían este verán, que felicidade para os desa comarca; igual que os das comarcas de Celanova, Salnés, Morrazo, Noia, As Pontes, etc., que, nestes últimos 25 anos, viron mellorar as súas infraestruturas.
Dende o ano 2000 pasaron 25 anos, eu son 25 anos máis vello (e o resto do persoal tamén), logo do último anuncio do actual Presidente da Xunta, xa dou por feito que no meu ciclo vital (biolóxico) non vou ver nunca unha circunvalación completa de Viveiro nin nada que se asemelle a unha Vía de Alta Capacidade na Mariña-Ortegal, o dunha Autovía xa o deixo para futuros séculos, pois no XXI e se seguimos con gobernos do PP é unha misión imposíbel.
Son circunstancias da vida, mais o malo é que só temos unha vida e o tempo váisenos entre promesas e incumprimentos e, por se fose pouco, continúan facendo novas promesas cando o noso ciclo biolóxico vai rematando. Porca miseria.
Xa asumo que, pola miña idade, non vou ver nin unha circunvalación de Viveiro nin ningunha autovía na Mariña-Ortegal, só agardo que a xente moza que aínda queda nestas comarcas teña unha maior capacidade crítica e comprenda que os votos serven para cambiar estas desastrosas políticas.
Contan as crónicas que cando Rueda anunciou en Viveiro esta nova corredoira, que tampouco temos ningunha garantía de que vaia cumprir, foi moi aplaudido, en fin.
Fernando Branco Parga
Veciño de Viveiro (Cantarrana)
A representación terá lugar este sábado día 18, ás 19:30 horas, no local social da Asociación de Veciños de Marzán, un dos destinos habituais nas xiras anuais da compañía. O Centiño mantén así a tradición de visitar este espazo, onde agarda compartir co público unha tarde divertida e chea de humor. A agrupación teatral continúa así coa difusión da súa nova obra, que segue a percorrer diferentes escenarios da comarca.
Dezaoito locais hostaleiros de Ribadeo, Rinlo e Vilaframil ofrecerán diversas preparacións ata o vindeiro domingo: en escabeche, en salpicón, en empanada, ao allo, á prancha, en albóndega, etc… Todas as propostas poden consultarse nas redes sociais de Acisa Ribadeo, que agradece “unha vez máis o apoio da OPP do Porto de Burela, que nos doou 90 quilos de cabala para estas xornadas, produto que entregamos de xeito gratuíto aos locais participantes. Achegámoslles así unha parte do peixe que empregarán nesta nova cita gastronómica na que tamén colabora o Concello de Ribadeo”. Ata o porto, ao restaurante Marinero, se achegaron este mediodía o director territorial da Consellería de Mar, Alexandre Piñeiro, as concelleiras ribadenses Montse Seijo, Elena Sierra e Begoña Sanjurjo, a presidenta de Acisa, Carmen Cruzado, o xerente do colectivo empresarial, Jesús Pérez, e o técnico de Acisa, Jorge Fernández, que puideron degustar as elaboracións realizadas por este establecemento hostaleiro.
Durante a xornada Lionel compartirá a súa experiencia no mundo da escrita, dando a coñecer os seus procesos creativos e as temáticas que caracterizan os seus libros. O acto incluirá un coloquio participativo cos asistentes do club onde poderán preguntar e intercambiar opinións co autor sobre o libro lido “A raíña das velutinas”.
O sábado terá lugar no Casino o III Showcooking, con cociña en directo e maridaxe de viños. O público poderá votar os seus pinchos favoritos e participar no sorteo dunha noite no hotel Marqués de Riscal. A entrega de premios será o luns 20 ás 19:00 h. O Concello e Destino Navia animan a veciños e visitantes a gozar desta cita gastronómica.
Haberá degustación diaria de ostras na carpa do porto. Concertos, showcookings, visitas guiadas e actividades mariñeiras. Lancha pola ría, exposición de maquetas e concurso fotográfico #somoslasostra2026, ademais propostas especiais en Acueo, La Casilla e Restaurante Peñalba.
A etapa, cun percorrido duns 150 quilómetros, partiu arredor das 11:30 horas e rematou en Barreiros, atravesando concellos como Xermade, Muras, Viveiro ou Foz. A proba reúne a equipos do ciclismo profesional internacional e sitúa a provincia de Lugo como escenario dunha das citas deportivas máis destacadas do calendario. O Goberno colabora no desenvolvemento da carreira a través das Forzas e Corpos de Seguridade do Estado, que velan polo correcto desenvolvemento da proba e pola seguridade de participantes e afeccionados.
As persoas interesadas poden anotarse ata o 24 de abril na Casa do Concello (Cervo) ou na Casa da Cultura (San Cibrao). A actividade está dirixida a persoas pensionistas empadroadas no municipio. Trátase dunha xornada pensada para compartir, celebrar e desfrutar en comunidade.
