Barreiros avanza na mellora da rede de abastecemento coa renovación de tubaxes en amplos treitos de San Cosme, Celeiro de Mariñaos e da zona da praia de Anguieira

O Concello recepcionou esta semana as últimas obras, financiadas pola Vicepresidencia da Deputación de Lugo cun investimento de 225.000 euros

Barreiros, 30 de abril de 2026. Esta semana concluíu -coa recepción oficial das obras- a segunda fase da mellora da rede de abastecemento de Barreiros, financiada a través dun convenio de colaboración entre o Concello e a Vicepresidencia da Deputación de Lugo.

As obras, executadas por Tragsa, realizáronse nos tramos máis deteriorados da rede secundaria, onde se renovaron as tubaxes (substituíndo as vellas conducións de fibrocemento por outras de polietileno) e as chaves de conexión e corte, aumentando o caudal e mellorando a eficiencia da submnistración das vivendas, granxas e negocios da contorna.

As actuacións, executadas por Tragsa, centráronse en Celeiro de Mariñaos, nas vivendas próximas á praia de Anguieira, na contorna das vivendas sociais de San Cosme e noutros tramos e ramais a carón da estrada estatal, tamén en San Cosme, entre a farmacia vella e a gasolineira.

Ademais, o Concello de Barreiros aproveitou ás obras para realizar melloras nas gabias e nas zonas das beirarrúas levantadas para executar as obras, entre elas, varios treitos a carón da N-634 entre a gasolineira e a casa consistorial.

O deputado Daniel García, a alcaldesa de Barreiros Ana Ermida, a concelleira de Educación Igualdade e Saúde Pública Montse Porteiro supervisaron as obras, acompañadas por operarios do Concello e por técnicos da Deputacion de Lugo e de Tragsa.

O deputado Daniel García destacou que conclúen “uns traballos que, ademais dun investimento importante, de 225.000 euros nesta segunda fase, supuxeron un esforzo técnico e administrativo ao incluir actuacións a carón dunha estrada estatal e en zonas rurais en que resultou complexo localizar as conducións”. Nese sentido, o responsable provincial destacou que “a colaboración entre administracións foi fundamental para levar a cabo este proxecto, que mellora un servizo básico para o día a día das veciñas e veciños”

Ana Ermida explicou que “damos un paso máis nos multiples investimentos que realizamos desde o concello para mellorar un servizo tan básico como o abastacemento de auga potable. Comezamos hai sete anos cun déficit moi importante nestas infraestruturas que imos corrixindo e que vai mellorando o servizo que recibe cada persoa nas vivendas e nas empresas”.

A alcaldesa subliñou que “son obras moi importantes tanto desde o punto de vista como económico como dos servizos básicos que moitas veces non se ven e non se valoran o suficiente porque unha vez finalizados non quedan a vista, pero sen dúbida todas e todos agradecemos que cando abrimos a billa saia auga de calidade” e avanzou que o Concello seguirá traballando neste ámbito “para dar servizo á realidade existente tendo en conta tamén o futuro desenvolvemento que poida producirse”.

A renovación das conducións da rede secundaria realizadas nos úlitmos meses dá continuidade aos traballos realizados o ano pasado noutros elementos da rede de abastecemento, como as melloras no depósito de Merille –fundamentalmente o tratamento das fisuras do depósito e a impermeabilización da cuberta– e na estación de bombeo da Folgueirosa, onde se se instalaron novas bomas e se adaptou a instalación hidráulica e eléctrica, cun investimento 118.00 euros.