O Foro Social da Mariña analiza este venres a mobilidade da comarca nunha conferencia en Foz

A Mariña, 16 de xuño, 2026. O Foro Social da Mariña organiza unha conferencia–coloquio titulada “Transporte, Mobilidade e Accesibilidade na Mariña: situación e alternativas”, que se celebrará o venres 19 de xuño ás 20:00 horas no salón de actos do CENIMA de Foz.

O relator será Miguel Pazos Otón, profesor titular de Xeografía Humana da Universidade de Santiago de Compostela, integrante do grupo de investigación ANTE (Análise Territorial) e do IDEGA.

A sesión abordará unha análise profunda da situación actual da mobilidade na Mariña e presentará alternativas para mellorar o acceso da cidadanía aos servizos básicos. O contido estrutúrase arredor de catro bloques principais:

1. Punto de partida

– A Mariña funciona como unha “cidade lineal” de 70.000 habitantes, distribuída ao longo da costa e con ramificacións cara ao interior.

– Existen carencias importantes en transporte, mobilidade e accesibilidade.

– Estas eivas afectan tanto ás conexións co resto de Galicia como á vertebración interna da comarca.

– É necesario repensar o modelo, priorizando a accesibilidade aos servizos básicos mediante infraestruturas axeitadas e mobilidade sostible.

2. Análise da situación actual

a) Mobilidade exterior

– Tradicional illamento respecto do resto de Galicia, fronte á continuidade natural coa rasa cantábrica e Asturias.

– A Autovía Transcantábrica supuxo un avance, pero só beneficia plenamente a Mariña Oriental e presenta limitacións.

– Illamento ferroviario: o FEVE non está operativo con normalidade.

– Servizos de transporte público escasos e con tempos de viaxe pouco adaptados á realidade actual.

– Dependencia do coche privado ou de redes informais (familiares, amigos, BlaBlaCar).

b) Mobilidade interior

A pesar de que a estrutura territorial permitiría un bo sistema de transporte público, a realidade é moi deficiente:

– Illamento das persoas sen coche propio.

– As familias necesitan un ou varios vehículos, cun custo elevado nos seus orzamentos.

– Os máis prexudicados: nenos, maiores e persoas con poucos recursos.

– As grandes infraestruturas presentan eivas:

– A autovía A-8 péchase con frecuencia pola néboa no Fiouco.

– Só hai autovía entre Barreiros e Ribadeo.

– O tren de FEVE está abandonado e funciona con horarios obsoletos.

3. Diagnose

O obxectivo non debe ser só construír máis estradas, senón garantir que a cidadanía poida acceder facilmente aos servizos básicos: hospital, centros educativos, traballo…
Cómpre reforzar o ferrocarril, o transporte público e colectivo, e impulsar o transporte á demanda.

4. Propostas

– Algunhas das alternativas que se presentarán para mellorar a mobilidade na Mariña:

– Transformar o FEVE nun tranvía moderno, con altas frecuencias e adaptado ao carácter policéntrico da comarca.

– Impulsar servizos de transporte á demanda, combinando autobuses escolares e taxis rurais, especialmente para conectar co Hospital da Mariña e con núcleos como Ribadeo ou Viveiro.

– Unificar todo o sistema de transporte baixo unha única dirección e cun billete único, o que require unha actuación decidida da Dirección Xeral de Transportes da Xunta e a colaboración dos concellos.