As XXIX Xornadas de Historia de Foz arrancan este luns cunha palestra sobre a represión franquista contra as mulleres

Foz, 26 de xullo, 2026. A XXIX edición das Xornadas de Historia de Foz arranca o luns 27 de xullo ás 20.30 horas cunha palestra da escritora e xornalista Montse Fajardo titulada “A represión franquista sobre as mulleres”. Fajardo é autora dunha ampla bibliografía sobre a represión de xénero na Galiza, sendo unha das pioneiras nestes estudos. Nesta dirección., é autora de libros como Matriarcas, mulleres en pé de vida, Un cesto de mazás, memoria das vítimas do 36 e do tempo que veu, Invisibles, A vida incerta. Biografía de Virxinia Pereira ou Caídas: achegamento ao ‘Patronato de Protección a la Mujer’ en Galicia.

Fajardo abordará os diferentes tipos de represión padecidos polas mulleres na Galiza, algunhas deles de carácter específico. Neste sentido, achegarase a historia daquelas que foron asasinadas, encarceradas ou remataron no exilio mais tamén a tipoloxías de represión exclusivas para a as mulleres como a rapa, a inxestión de aceite de rícino, a tatuaxe, ou a violación, co agravante de que, mentres que nos homes se perseguiu o que se consideraba delito, nas mulleres castigáronse tamén as actitudes que chocaban cos valores e a moral imposta polo réxime.

A escritora e xornalista destaca que “as mulleres non só se viron afectadas polos mesmos tipos de represión que os homes -foron asasinadas, encarceradas, depuradas ou sufriron o exilio- senón que, ademais, o fascismo ideou para elas castigos de índole especialmente machista como a rapa, a inxestión de aceite de rícino, a tatuaxe, ou a violación, co agravante de que, mentres que nos homes se perseguiu o que se consideraba delito, nas mulleres castigouse tamén o “pecado”, calquera actitude que se saíse do abafante corsé franquista, cinguido pola misóxina visión da Igrexa. Iso levou a moitas mozas a acabar recluídas en institucións relixiosas a través do temido Patronato de Protección a la mujer, vixente ata mediados dos anos 80.

O asasinato de María del Carmen Pérez praia da Areoura en Cangas

Fajardo recuperará na palestra historias concretas de mulleres que padeceron a represión franquista. Unha delas é a de María del Carmen Pérez García, cuxo cadáver mutilado apareceu o 5 de outubro de 1936 na praia de Areoura, en Cangas de Foz. Pérez García, natural da parroquia de Vigo, en Navia (Asturias), correu a mesma morte que o seu irmán José, un rico propietario que fixo fortuna en América que mantivo unha posición progresista durante o período republicano e que resultou asasinado neses mesmos días de outubro de 1936 na tristemente celebre Ponte de Pedrido, entre os concellos da Pontenova de San Tirso de Abres.

María del Carmen Pérez García e o seu irmán foron asasinados polas milicias falanxistas. Porén, a primeira moi mal ferida logrou fuxir da Ponte de Pedrido e agocharse nunha casa de Vilaformán en Trabada, mais os propietarios da mesma optaron por entregala de novo aos fascistas que remataron por executala de xeito definitivo na praia canguesa de Areoura.

Palestra e concerto de Mini Rivas

As xornadas continúan o martes 28 de xullo ás 20.30 cunha palestra e un concerto do músico Mini Rivas, que versará sobre a música represaliada e resistente durante a ditadura. Mini Rivas é un dos músicos galegos máis recoñecidos e coñecidos das últimas cinco década, sendo a mediados dos anos 70 foi un dos fundadores do mítico grupo Fuxan os Ventos, participando na década seguinte na creación do grupo A Quenlla e conformando xa no século XXI un dúo con outro integrantes destas dúas formacións Mero Iglesias. Rivas, á súa condición de músico, suma o seu labor como estudoso e investigador da tradición musical galega.