Este martes haberá dous plenos extraordinarios no Concello de Ribadeo

Ribadeo, 12 de agosto de 2019. Este martes haberá dous plenos extraordinarios no Concello de Ribadeo. Na sesión convocada para ás 20:30 horas abordaranse cuestións coma os festivos locais do ano 2020, que serán o 25 de febreiro (martes de Antroido) e o 8 de setembro (día da patroa); así como varias modificacións de crédito para levar a cabo actuacións de mellora na Casa da Cultura ou obras en camiños rurais de Covelas e da Devesa.
O rexedor explicou que “nun destes plenos que temos previstos para mañá trataremos varios puntos. O primeiro deles é a fixación dos festivos locais para o ano 2020, destes dous festivos que os Concellos podemos determinar vamos propoñer o 8 de setembro, que é o día da patroa, e o martes de Antroido, o 25 de febreiro, porque no ano 2020 o outro día que habitualmente se fai festivo local, que é o día de San Roque, cadra en domingo e polo tanto xa non fai falta que o Concello o declare como festivo local. Polo tanto en 2020 teremos tres, que serán a patroa, San Roque e o martes de Antroido”.
Suárez Barcia contou que “tamén no pleno vamos levar adiante varios puntos que son basicamente modificacións de partidas orzamentarias para traspasar recursos de onde non se prevé que se necesiten no resto do ano para outras partidas nas que si van facer falta, concretamente para facer actuacións de mellora na Casa da Cultura, para combater determinadas humidades que ven arrastrando desde hai tempo, así como para realizar unha extensión do programa de mellora de vías de comunicación municipais nas parroquias de Covelas e A Devesa, que se veñen sumar a todas estas actuacións que nos vindeiros días iniciaremos tamén deste tipo de melloras en vías de comunicación municipais en todas as parroquias do concello”.
O alcalde ribadense engadiu que “tamén levaremos ao pleno, tal e como dixemos tempo atrás, unha declaración de non dispoñibilidade de crédito nas obras do estadio Pepe Barrera. Isto quere dicir que, tal e como se anunciou hai un par de meses, o Concello dispuxo de todo o montante económico para actuar no campo de fútbol Pepe Barrera, onde se están facendo unhas obras moi importantes cunha cantidade económica tremenda, 421.000 euros, e daquela o Concello puxo todo da nosa hucha para a execución das obras e que non se demorase máis do debido por cuestións administrativas. Hai que recordar que outras dúas administracións se comprometeron a poñer algo de financiamento: por unha banda a Deputación e por outra a Xunta de Galicia. Daquela a Deputación anunciou e cumpriu tamén coa sinatura dun convenio coa cantidade de 140.000 euros. Pois agora polo tanto da cantidade total que puxemos desde o Concello, dos 421.000 euros que viñeron do remanente de Tesourería, é dicir da nosa hucha, imos volver nela a cantidade de 140.000 euros que nos dá a Deputación porque está asinado o convenio con todas as garantías; non así aínda podemos dicir o mesmo da asombrosa cantidade, de 46.000 euros dos 421.000, que se comprometeu a poñer a Xunta de Galicia porque a día de hoxe aínda non o temos confirmado. En todo caso vamos paso a paso e o que temos confirmado, que é o da Deputación, ese diñeiro volvemos metelo na nosa hucha para futuras actuacións”.