Lugo, 27 de novembro de 2019. A Deputación de Lugo consolídase como referente en políticas sociais destinando a este eido o 33% do Orzamento do 2020, que ascende a case 92M€ (91.742.793,61€), incluído o da propia entidade provincial, o de SUPLUSA e o do Consorcio de Bombeiros. Así o explicou o Presidente, José Tomé Roca, que, xunto á Vicepresidenta, Maite Ferreiro, e a Deputada de Economía, Facenda, Recadación e Contas, Mayra García, presentou este mércores no Salón de Actos o proxecto de Orzamentos do vindeiro ano.
Tomé Roca convocou hoxe mesmo a Comisión de Contas para o vindeiro luns, co fin de someter a debate e aprobación as contas nun Pleno extraordinario o xoves da vindeira semana, 5 de decembro. Deste xeito, “cumpriremos co obxectivo que nos marcamos ao principio do mandato de ter en vigor os orzamentos dende primeiros de ano, pois só desta forma son verdadeiramente eficaces e cumpren cos obxectivos para os que están elaborados”, afirmou o Presidente.
Os presupostos aumentan 3,2M€, preto dun 4%, con respecto aos deste 2019, un incremento debido fundamentalmente á subida da participación nos tributos do Estado.
No Orzamento de 2020 reflíctese a decisión de disolver a Sociedade Urbanística Provincial (SUPLUSA) e elimínase a achega da Deputación ao ente mercantil porque, ao estar en fase de liquidación, non é necesario aportar fondos tendo en conta ademais os recursos existentes na propia sociedade.
O Presidente subliñou que o Orzamento 2020 “está pegado á realidade da provincia e aplica a través da cooperación cos concellos políticas progresistas para favorecer a cohesión social, o equilibrio territorial e o impulso da economía e o emprego, mantendo ao mesmo tempo a consolidación e a solvencia da Deputación en termos económicos financeiros”. Así, o organismo provincial, afirmou, contribúe a “mellorar a calidade de vida dos veciños e veciñas da provincia e a fixar poboación, axudando a combater coas ferramentas que temos a grave caída demográfica que estamos a sufrir”.
Para iso, asegurou José Tomé, os presupostos potencian catro grandes liñas de actuación. A prioritaria son as políticas sociais, para o están destinadas partidas que superan os 30M€, o que represente preto do 33% do total dos presupostos.
Rede de Protección Social
Tal e como destacou o Presidente, a de Lugo é hoxe unha das poucas deputacións de toda España “cunha ampla Rede de Protección Social, que, non só favorece o benestar e a conciliación, senón que xera actividade económica e emprego sostible na nosa provincia”. De feito, as prestacións sociais financiadas pola entidade provincial manteñen máis de 300 postos de traballo.
Os Orzamentos do vindeiro ano destinan 9M€ para os Centros de Atención a Maiores, a partida necesaria para o funcionamento das tres residencias abertas –Pol, Trabada e Ribadeo- e para a apertura das da Fonsagrada, Castroverde e Pedrafita do Cebreiro, así como, se fose posible, as de Meira e Ribas de Sil.
O Presidente reiterou de novo que o Goberno provincial seguirá adiante con todos os compromisos adquiridos cos concellos, pero, ao mesmo tempo, “dende a lealdade institucional e a través do diálogo, esixiremos á Xunta de Galicia que asuma a súa responsabilidade en materia de servizos sociais”.
Xunto ás residencias, o Orzamento dota de recursos aos outros dous servizos que basicamente conforman a Rede de Protección Social da Deputación: a Teleasistencia Domiciliaria (375.000€), que pasa a contar cun 13% máis de prazas ofertadas, ata chegar a cerca das 2.000, e o Servizo de Axuda no Fogar, con 1,3M€, achegados aos concellos a través do Plan Único.
Tamén dentro das políticas sociais, o Orzamento do 2020, segundo explicou José Tomé, reserva 5M€ para impulsar a creación de emprego a través de liñas de axuda para a contratación de desempregados, plans de formación ou apoio ao emprendemento, ben de xeito directo ou a través da cooperación cos Concellos.
A defensa do Goberno provincial dunha educación pública, gratuíta e universal como base da igualdade de oportunidades plásmase tamén nos Orzamentos cunha dotación económica de 2,6M€, dos que máis da metade -1,5M€- está destinado ó Centro de Formación do Servizo de Audiovisuais, o único con esta titulación que existe na provincia, e que ademais é público e con matrícula gratuíta, agás para os repetidores.
Cooperación cos concellos
A cooperación cos concellos é unha política transversal da Deputación que ten como un dos principais instrumentos en torno aos que se artella o Plan Único, que contará o vindeiro ano cunha dotación económica de algo máis de 20M€, entre a partida consignada nos Orzamentos (11,2M€) e a previsión de incorporación de remanentes, o que supón un incremento con respecto ao 2019.
Este programa de investimentos municipais establecerá “un reparto transparente, equitativo e xusto dos fondos públicos da Deputación con criterios obxectivos, aprobados no Pleno, entre os 67 concellos da provincia”, indicou José Tomé.
Os fondos do Plan Único estarán destinados á dotación e mellora de servizos e infraestruturas públicos; o Servizo de Axuda no Fogar; creación de emprego; promoción de actividades turísticas, culturais e deportivas; para avanzar na administración electrónica e para soster outros servizos como Protección Civil.
O Presidente pediu unha vez máis á Xunta de Galicia “que tome nota e elimine xa a política discrecional que está a practicar no reparto dos fondos públicos, discriminando aos concellos que non son da súa mesma cor política”.
Mellora da rede viaria
Dende o convencemento de que a mobilidade “é un dereito máis da cidadanía e un factor esencial para garantir a cohesión social, territorial e económica da provincia de Lugo”, a Deputación sitúa a mellora da rede viaria como unha prioridade nos Orzamentos do 2020, destinando preto de 14M€ entre operacións de mantemento e de conservación, obra nova ou a través do Parque Móbil, outra das importantes ferramentas de cooperación que temos a disposición dos Concellos.
O Presidente destacou co “importante esforzo económico que fai a Deputación para atender o mellor posible as estradas, tendo en conta que conta coa maior rede viaria provincial de España, con 4.200 quilómetros, e tres veces superior á da Xunta en Lugo”.
Impulso dos sectores produtivos: primario e turístico
Froito da “visión clara de cales son as oportunidades económicas da provincia”, a Deputación incide no Orzamento 2020 no impulso dos sectores produtivos, nomeadamente do primario e o turístico.
Así, os presupostos contemplan 2M€, destinados, entre outras actuacións a potenciar o Centro de Recría de gando vacún de leite, o primeiro de carácter público que se abriu en España, no que a día de hoxe xa son máis de 1.100 becerras de 50 explotacións da provincia as que se están a recriar; poñer en marcha e manter o funcionamento da Granxa Experimental de Leite, o primeiro centro de investigación sobre o sector lácteo da provincia; impulsar a creación nas instalacións provinciais da Granxa Gayoso dunha explotación de porco celta que potencie a cría e a comercialización da única raza porcina autóctona de Galicia; implantar na Finca de Tor novas actividades relacionadas coa produción ecolóxica; activar novas liñas de axuda aos produtores para que poidan aumentar a base territorial das súas explotacións; e apoiar a actividade do sector primario con axudas económicas ao tecido asociativo.
Outra das grandes apostas da Deputación no eido económico para a provincia é o sector turístico a través da promoción do territorio, ao que dedica máis de 2,4M€ nos Orzamentos. No ano 2020, explicou o Presidente, “seguiremos impulsando actuacións no marco do Plan Estratéxico de Turismo, especialmente dirixidas a incorporar as innovacións tecnolóxicas ao sector, co fin de mellorar a difusión e o acceso á oferta, así como a experiencia do visitante”.
Así mesmo, continuou, “daremos un novo impulso á candidatura da Ribeira Sacra a Patrimonio da Humanidade para culminar un percorrido que abrimos dende a Deputación no ano 2011, e ao que logo se sumaron outras institucións, como a Deputación de Ourense ou a Xunta de Galicia”.
Dende a Deputación de Lugo, asegurou José Tomé, “traballaremos para que a provincia teña un papel central de cara ao Xacobeo 2021 e poida aproveitar todo o enorme potencial que representa o turismo vinculado ao Camiño de Santiago, en todas as súas variantes”.
O Presidente anunciou tamén que Lugo formará parte o vindeiro ano da Rede Europea de Itinerarios Culturais, o que terá un efecto positivo en toda a provincia e, especialmente, na Ribeira Sacra.
Dezaoito locais hostaleiros de Ribadeo, Rinlo e Vilaframil ofrecerán diversas preparacións ata o vindeiro domingo: en escabeche, en salpicón, en empanada, ao allo, á prancha, en albóndega, etc… Todas as propostas poden consultarse nas redes sociais de Acisa Ribadeo, que agradece “unha vez máis o apoio da OPP do Porto de Burela, que nos doou 90 quilos de cabala para estas xornadas, produto que entregamos de xeito gratuíto aos locais participantes. Achegámoslles así unha parte do peixe que empregarán nesta nova cita gastronómica na que tamén colabora o Concello de Ribadeo”. Ata o porto, ao restaurante Marinero, se achegaron este mediodía o director territorial da Consellería de Mar, Alexandre Piñeiro, as concelleiras ribadenses Montse Seijo, Elena Sierra e Begoña Sanjurjo, a presidenta de Acisa, Carmen Cruzado, o xerente do colectivo empresarial, Jesús Pérez, e o técnico de Acisa, Jorge Fernández, que puideron degustar as elaboracións realizadas por este establecemento hostaleiro.
Durante a xornada Lionel compartirá a súa experiencia no mundo da escrita, dando a coñecer os seus procesos creativos e as temáticas que caracterizan os seus libros. O acto incluirá un coloquio participativo cos asistentes do club onde poderán preguntar e intercambiar opinións co autor sobre o libro lido “A raíña das velutinas”.
Ao longo desta semana, máis de 40 científicas, divulgadoras, xornalistas e activistas participan nunha campaña simultánea en todo o Estado para achegar á cidadanía as consecuencias que os recentes ataques a Irán poden ter na vida cotiá. No marco desta iniciativa, celebrarase en Ribadeo un acto informativo o venres 17, na Escola Municipal de Música, ás 19:00 horas. Toda a información sobre o No Normal Tour está dispoñible en: 
O sábado terá lugar no Casino o III Showcooking, con cociña en directo e maridaxe de viños. O público poderá votar os seus pinchos favoritos e participar no sorteo dunha noite no hotel Marqués de Riscal. A entrega de premios será o luns 20 ás 19:00 h. O Concello e Destino Navia animan a veciños e visitantes a gozar desta cita gastronómica.
Haberá degustación diaria de ostras na carpa do porto. Concertos, showcookings, visitas guiadas e actividades mariñeiras. Lancha pola ría, exposición de maquetas e concurso fotográfico #somoslasostra2026, ademais propostas especiais en Acueo, La Casilla e Restaurante Peñalba.
A etapa, cun percorrido duns 150 quilómetros, partiu arredor das 11:30 horas e rematou en Barreiros, atravesando concellos como Xermade, Muras, Viveiro ou Foz. A proba reúne a equipos do ciclismo profesional internacional e sitúa a provincia de Lugo como escenario dunha das citas deportivas máis destacadas do calendario. O Goberno colabora no desenvolvemento da carreira a través das Forzas e Corpos de Seguridade do Estado, que velan polo correcto desenvolvemento da proba e pola seguridade de participantes e afeccionados.
O acto está organizado pola A.C. Francisco Lanza e contará coa participación de Dores Fernández Abel, en representación da entidade, xunto co autor da obra. Duarte Correa xa visitara Ribadeo no ano 2022 para ofrecer unha charla sobre a situación política internacional, centrada daquela na guerra de Ucraína. Nesta nova ocasión, o público poderá volver seguir a súa capacidade de análise e síntese, que lle permitirá ofrecer unha visión actualizada dun contexto xeopolítico en constante transformación.
