O Alcalde de Burela amosouse satisfeito ao recuperar o concello a libre mobilidade. O rexedor destacou o traballo feito polo Hospital da Mariña e o esforzo da veciñanza

 Burela, 22 de xullo de 2020. O alcalde, Alfredo Llano, amosouse satisfeito porque o municipio recuperou a libre mobilidade despois de doce días de confinamento. O rexedor subliñou que baixou de xeito considerable o número de contaxios, destacou o traballo realizado polo Hospital da Mariña e tamén o esforzo da veciñanza.
Alfredo Llano declarou: “recibimos unha noticia que agardábamos xa. A verdade é que levábamos tempo co confinamento de Burela derivado do brote no que tivemos moita xente afectada. É certo que chegamos ter 140 positivos o 12 de xullo e iso era moito no noso concello, agora quedan 40, co cal baixouse cen nunha semana. Iso significa que o brote está controlado e cortada a cadea de contaxios. Calculo que eses 40 baixarán entre hoxe e mañá”.
O alcalde salientou que “houbo moito traballo detrás. Hai que ter en conta que no hospital realizaron en total máis de 4.000 PCR, que é unha cifra extraordinaria que indica a dimensión e o traballo que houbo para controlar o brote”.
O rexedor burelés contou que “ás cero horas do xoves recupérase a mobilidade total, igual que están os outros concellos da Mariña. Era algo que nos tardaba porque levamos doce días con este confinamento. Eu noto que isto afecta, non soamente á situación socioeconómica, senón tamén ao estado de ánimo da xente, polo que penso que a partir de agora temos que tratar de manter o optimismo. A partir de mañá toda A Mariña, Burela incluída, podemos ter a liberdade para ir a onde queiramos e iso é moi bo. Hai algo que creo que tamén é moi positivo para a restauración, que é que poden abrir unha hora máis, agora estaban ata as doce, durante sete días, e vaise manter de momento o aforo do cincuenta por cento. Tamén se vai indicar que non se poden facer festas nocturnas, nin botellóns nin reunións de máis de dez persoas. Isto hai que mantelo porque tal como se comprobou estes días hai que evitar volver ter outro brote e desde logo seguir como fixo a xente da Mariña, e concretamente a de Burela, como traballou e como se implicou na responsabilidade de gardar os protocolos. Foi un logro colectivo derivado da solidariedade que amosou toda a xente. Iso hai que salientalo e felicitalos”.
Alfredo Llano explicou que “mañá imos ter outra reunión cos responsables de Sanidade e imos ir vendo como vai evolucionando. Queremos dar as grazas porque hoxe todo o mundo amosouse moi solidario con Burela por recuperar a liberdade, tanto os alcaldes e alcaldesas da comarca como a Consellería de Sanidade. Isto significa que esta situación serviu para estar máis unidos, máis coordinados, traballar en conxunto, animar á xente que consuma na nosa comarca e que veña agora porque esta experiencia, ao ser positiva, vai dar lugar a que a xente de fora teña máis respecto por nós e máis motivación para vir aquí”.
O alcalde de Burela quixo “dar as grazas ao persoal do hospital que traballou moi duro e coordinadamente co Concello de Burela. Fíxose unha actuación extraordinaria e hai que recoñecer todo o mérito, vendo como foi, a cantidade de traballo que hai detrás e o resultado consecuencia dese bo traballo. Quero ademais animar á xente a que siga cumprindo os protocolos e quero recoñecer o mérito extraordinario que teñen co seu comportamento solidario que deu lugar a que recuperáramos o antes posible esta normalidade. Estamos contentos, imos seguir así, e desde logo tratar de seguir colaborando entre todos para sentir nosoutros a confianza que poidamos transmitir ao resto do mundo para que poidan vir ata aquí con toda a normalidade, sentíndose seguros e a gusto, que é como teñen que estar aquí na Mariña”.