O PP de Viveiro insta ao goberno local a reclamar da Deputación que roce as beiras da LU-P 6502 no perigoso cruce coa pista de Morgade

Viveiro, 27 de outubro de 2021. O goberno provincial recoñeceu na máis recente sesión plenaria da Deputación a súa incapacidade para manter en bo estado o conxunto da rede de estradas da que é titular. O deficiente estado de moitas destas vías crea situacións de perigo aos seus usuarios, especialmente a aqueles que teñen que usalas con frecuencia. En Viveiro, a LU-P 6502 (de Vilalba por A Balsa a Chavín) ten, entre outros, un punto moi perigoso, que é a súa intersección coa pista de Morgade, no quilómetro 47, en Os Muíños. O grupo municipal do PP intenta que o goberno local faga as xestións necesarias para corrixir a actual situación.

Os populares de Viveiro, que teñen por portavoz a Óscar Rodríguez, presentarán unha proposta ao goberno local, presidido pola socialista María Loureiro (integrante do grupo de goberno da Deputación) para que se dirixa ao goberno provincial co fin de que adopte as medidas oportunas para eliminar a situación de risco na intersección das dúas vías. Os populares explican que a pista de Morgade desemboca na LU-P 6502 nunha curva moi pronunciada. A maleza que medra nas beiras dificulta a visibilidade do tráfico, especialmente aos vehículos que pola vía provincial circulan desde Viveiro e pretenden incorporarse á pista de Morgade.

Os concelleiros populares din que é preciso cortar a maleza e que, por tratarse dunha vía provincial, esta tarefa parece corresponderlle á Deputación. Se non fora así, debido a que hai un regato, e puidera ser outro organismo o responsable de limpar as beiras, a Deputación debería de poñerse en contacto con el para que leve a cabo os traballos necesarios.

No PP din que sería lamentable que por non cortar a maleza acabara producíndose un accidente.

Con esta iniciativa, os concelleiros populares de Viveiro dan resposta ás demandas dos veciños máis directamente afectados, que se queixan da falta de seguridade vial nese punto da citada estrada provincial.