Lourenzá, 28 de marzo de 2022. O equipo de goberno de Lourenzá considera pouco crible o ofrecemento do Partido Popular laurentino de colaborar na elaboración dos orzamentos. Baséanse para afirmar isto en que “o seu voceiro nin sequera asistiu á comisión económica onde se presentaron antes de levalos ao pleno municipal. Ademais cando asiste a estas comisións non aporta absolutamente nada, limitándose a levar ao pleno a resposta escrita ao ditado”.
O goberno municipal aclara que “o señor Rodríguez falta á verdade cando afirma que o goberno local subiu os impostos municipais, cando foi todo o contrario. Non se cobraron as taxas por terrazas aos locais de hostalería, baixouse o prezo da recollida de lixo, reduciuse o IBI das explotación agrarias, etcétera. Desde que goberna o Partido Socialista (ano 2015) non se subiu ningún imposto municipal. Acórdase o voceiro popular na nota de prensa da RPT dos traballadores do Concello, pero non o fixo no pleno municipal, onde se lle informaría que está na última fase, despois de seren estudadas e resoltas as reclamacións co beneplácito das organizacións sindicais. Se tan urxente era para o Partido Popular a RPT por que non a elaborou mentres gobernaron Lourenzá? Tempo tiveron dabondo. E non se acordou o señor Rodríguez no seu escrito de falar das estradas e camiños municipais. Será porque todo o mundo recorda o estado no que se atopaban cando nolos deixaron en herdanza. Debera darlles vergoña e medirse máis á hora de criticar o traballo dos demais. Todos os veciños e veciñas do concello sabían cando estaban cerca as eleccións municipais porque vían como quince días antes aparecían as máquinas tapando algún que outro bache”.
O equipo de goberno laurentino engade: “queixase o voceiro popular de que se privatizou algún servizo municipal. Que saiba que a este equipo de goberno gústalle o público e que está en contra das privatizacións. Todos os servizos que están privatizados no Concello son obra do Partido Popular. O goberno de Lourenzá está disposto a apoiar calquera iniciativa que propoña o grupo popular a favor de desprivatizar todos os servizos municipais que na actualidade están con concesións a empresas privadas. Queremos facelo por consenso, polo que animamos ao señor Rodríguez a que presente a proposta ao pleno e contará co noso apoio e seguramente tamén co do grupo nacionalista”.
O goberno municipal tamén manifesta que “mente o voceiro popular cando fala do gasto que supón pagar aos membros do equipo de goberno. A cifra á que se refire o señor Rodríguez inclúe o salario da alcaldesa, a dedicación parcial do tenente alcalde e as retribucións a todos os concelleiros e concelleiras por asistencia a plenos e comisións. Aquí tamén está incluído o que perciben os concelleiros populares. Que saiban que non é obrigatorio cobralas, poden renunciar a elas cando queiran, sería un aforro para as arcas municipais”.
Os gobernantes locais de Lourenzá engaden que “aínda que non o menciona no escrito, o voceiro popular rematou a súa intervención no pleno facendo unha crítica velada á actuación da orquestra Panorama programada para o 14 de abril pola Comisión de Festas do Conde Santo. Parece que ao señor Rodríguez non lle gusta moito esta iniciativa, pero pode ter a seguridade de que este equipo de goberno apoiará sempre as iniciativas promovidas polas distintas comisións de festas e asociacións do municipio”.
“E, por último, o que máis sorprende ao equipo de goberno é que o señor Rodríguez fale da falta de traballo por parte de goberno local, cando el como voceiro popular non presentou nin unha soa moción nos case tres anos que van de lexislatura; simplemente se limitou a asinar as mocións conxuntas que se presentaron a proposta do grupo socialista, como a de solicitar que o Día das Letras Galegas se lle dedique a Fernández del Riego. Parece que agora empeza a espertar, será porque xa queda un ano para as próximas eleccións e estará postulándose e facendo méritos para volver a ser o candidato popular. Desexámoslle moita sorte, vai necesitala”, remata o equipo de goberno laurentino.
A proba, organizada polo CP Altrúan, reuniu máis de 130 palistas dos seis clubs lucenses de augas tranquilas que participan na competición: o propio Altruán, o CD San Ciprián, o Club Kayak Foz, o CP Viveiro Urban Hotel, o Cidade de Lugo e o Club Fluvial de Lugo. O deputado de Mocidade Daniel García entregou os premios da proba, na que Club Fluvial de Lugo, Cidade de Lugo e Altruán coparon o podio por equipos. A Copa Deputación de Piraguismo, que conta de 6 regatas, organízase no marco da colaboración que a Vicepresidencia da Deputación de Lugo mantén coa Federación Galega de Piragüismo para a promoción deste deporte, ofrecendo aos clubs a posibilidade de participar en competicións federadas nas súas comarcas e contribuíndo así á consolidación de equipos de base.
Malia a intensa calor, o pavillón encheuse de público para gozar das actuacións das numerosas alumnas, que ofreceron exercicios individuais, por parellas e en grupo, destacando pola súa beleza e dificultade técnica ao ritmo da música escollida. Ao remate, a concelleira Ana Rubal entregou medallas ás participantes, que tamén agradeceron o traballo e os valores transmitidos pola súa monitora, Lorena Fernández. Lémbrase que a festa de clausura das Escolas Deportivas terá lugar o luns 29 ás 19:00 horas, nun acto conxunto co Concello de Alfoz, no que haberá diversas actividades de celebración e a entrega de diplomas.
A cantante e instrumentista asturiana Mónica Acevedo actuará en formato solista, mentres que o equipo do local ofrecerá un menú especial con pratos como o tartar de xarda, gañador do “Ribadeo Sabe”, gazpachuelo de tempada, lomo de sardiña con berenxena afumada, cóctel de lagostinos, bonito de Burela con melocotón asado e sopa de cebola, e solombo de porco celta con xudías tenras. A cita comeza ás 21:15, con prazas limitadas e reserva imprescindible.
A xornada incluíu tamén o IV Torneo de Pádel, que continuará durante a fin de semana. O evento, organizado polo Concello xunto con ASAPA e Miño Vivo e coa colaboración da Xunta, recupera unha iniciativa nacida hai catro anos a petición da mocidade, coa intención de consolidala no tempo. O tenente de alcalde, Marcos García Lombardero, destacou a alta participación —catro veces maior ca na primeira edición— e agradeceu a implicación de entidades, colaboradores e asistentes, así como a presenza de representantes da Xunta, do Parlamento e da Deputación.
Adultos, nenos, familias, grupos de amizades fixeron o percorrido nun día espectacular de sol e cunha temperatura de 26º á hora da saída. Acudiron á cita o presidente provincial da AECC, José Manuel Rozas, o alcalde de Ribadeo, Dani Vega, as concelleiras e concelleiro ribadenses, Marta Saiz, Begoña Sanjurjo, Elena Sierra e Francisco José Silvent, a presidenta e o xerente de Acisa, Carmen Cruzado e Jesús Pérez, así como representantes da AECC de Ribadeo coa súa presidenta, Tea Martínez, á cabeza. A II Andaina Ribadeo en marcha contra o cancro contou co patrocinio de Solán e Acisa Ribadeo e coa colaboración do Concello de Ribadeo, Eroski e 2M.
A partir das 19:45 horas abrirán a xornada o Cuarteto Illa Pancha e Tradigalu, mentres que desde as 20:00 horas se poderán degustar hamburguesas á parrilla, bocadillos de panceta e chourizos asados. Xa pola noite, ás 21:30, tomarán o relevo Mi Rollo es el Rock, antes da tradicional fogueira de San Xoán, prevista para as 00:00 horas. A celebración, organizada por A Rebolaxe coa colaboración do Concello de Cervo e a Deputación de Lugo, inclúe tamén o sorteo dunha paleta de cocho e contará con aparcamento habilitado no Estanco da Praia do Torno.
Pasada a medianoite, un vehículo saíuse da vía na N-634. Como consecuencia do impacto, tres persoas resultaron feridas. Da asistencia sanitaria ocupáronse os profesionais de Urxencias Sanitarias de Galicia-061 e os axentes da Garda Civil de Tráfico da seguridade na vía. Os Bombeiros de Barreiros tamén acudiron, sen embargo, ningún dos feridos estaba atrapado.
