Máis de 250 estudantes presentaron os seus deseños ao certame ilustrarNÓS, convocado pola Vicepresidencia da Deputación

A entrega de premios será o 30 de maio na Sala de Exposicións do Pazo de San Marcos

Lugo, 25 de maio de 2022. O II Certame Escolar de Ilustración ilustrarNOS convocado pola Vicepresidencia da Deputación de Lugo recibiu 252 traballos de estudantes de centros educativos de primaria, secundaria, bacharelato e ciclos. Trátase de ilustracións orixinais e inéditas ao redor do lema proposto nesta segunda edición do certame “Contra o cambio climático, actúo”, que convidaba a representar graficamente esa idea, visibilizando solucións fronte á emerxencia climática.

A vicepresidenta da Deputación , Maite Ferreiro, sinalou “o incremento da participación con respecto á primeira convocatoria, de preto dun 25%, que nos reafirma na vontade de darlle continuidade á iniciativa, tanto no que respecta ao propio certame como o resto das actividades relacionadas coa creatividade artística e plástica que vimos organizando nos centros escolares co programa IlustrarNÓS”.

Un xurado formado pola ilustradora Laura Romero, a deseñadora gráfica Belén Freijeiro e Alejandro Carro, vicedirector da Escola de Arte e Superior de Deseño Ramon Falcón de Lugo, encargouse da valoración das obras, tendo en conta aspecto como a orixinalidade e a creatividade na interpretación da cita, a técnica e composición da imaxe ou a súa aportación narrativa.

Os galardóns aos mellores traballos de cada categoría entregaranse o vindeiro 30 de maio, ás 19:00 horas, na Sala de Exposicións do Pazo de San Marcos. Os seus autores e autoras recibirán como premio un IPAD con aplicacións de deseño gráfico e unha colección de libros ilustrados (álbum, banda deseñada, novela gráfica, etc.)