Foz, 30 de abril de 2024. A concelleira da Aula Universitaria da UNED en Foz, Elena Martínez Pena, e a coordinadora da mesma, Marta Muiña Rodríguez, dan conta da nova programación formativa do centro para o mes de maio. Presentan varias actividades para as que está aberta a inscrición. Anuncian que se trata nesta ocasión “de diferentes charlas, dúas presentacións de libros e unha actividade especial que pon o broche final a este curso: un roteiro interpretativo”.
Elena Martínez e Marta Muiña especifican que “o xoves 9 de maio levarase a cabo unha charla informativa sobre Mentalización e sensibilización da saúde mental, a cargo da Asociación Saúde Mental A Mariña. Vai dirixida a todos os públicos e especialmente ás familias do alumnado do IES de Foz, institución colaboradora na organización da conferencia e que albergará a actividade no seu salón de actos en horario de 18:30 a 20:00 horas. Ten como obxectivo primordial mellorar a calidade de vida das persoas con enfermidade mental e a das súas familias, minimizando o estigma que supón padecer unha enfermidade mental, así como abordar as adiccións como un factor de risco claro no inicio e agravamento/mantemento das mesmas”.
Tamén explican que “do 13 ao 16 de maio terá lugar un ciclo de catro charlas informativas baixo o título Muller. Falamos claro, realizadas por catro profesionais: unha matrona, unha nutricionista, unha fisioterapeuta e unha psicóloga. Ten como obxectivo falar abertamente do corpo da muller e as cuestións relativas aos ámbitos directamente relacionados co xénero feminino. Desenvolverase de luns a xoves de 18:00 a 20:30 h na aula universitaria.”
O venres 10 de maio a focega Natalia Alonso presentará o seu segundo libro, Advertencias para un traxecto boreal, galardoado co Premio de Poesía Filomena Dato 2022. Será ás 20:30 horas na Biblioteca Municipal Salgado Toimil. “Esta actividade inaugura unha colaboración entre as dúas entidades, a UNED e a Biblioteca Municipal, que a partires de agora van realizar as presentacións de libros de forma conxunta e colaborativa”, comenta Muiña, coordinadora da Aula, ao que Elena Martínez, concelleira da mesma, engade: “pensamos que sería interesante albergar as diferentes actividades deste tipo nas instalacións da casa da cultura, tanto no Salón de Actos como na Biblioteca Municipal. Tanto é así que repetirán sesión uns días despois servindo de altofalante nesta ocasión a Rosalía GT, autora ribadense que nos trae consigo Unha pedra no zapato, un libro de autocoñecemento e reflexión, feminista e en galego. Terá lugar tamén na biblioteca, o mércores 15 de maio ás 19:30 horas”. Muiña invita aos autores e autoras a dirixirse á Aula Universitaria da UNED de Foz en caso de querer presentar as súas obras “tal como fixo Rosalía, que nos contactou explicándonos os detalles do seu libro e mostrando o seu interese por facer esta actividade con nós”. A concelleira, moi comprometida co labor cultural, tamén indica: “ás veces non chegamos a todos e está ben que se nos recorde o que hai feito, para estudalo e se é posible presentalo á veciñanza”.
Muiña séntese especialmente ilusionada coa actividade final que programan para finalizar este curso 23-24, o primeiro no que está á fronte da Aula Universitaria. Explica que “desta volta a actividade leva o meu selo persoal xa que se buscou conxugar natureza e aprendizaxe, e por iso se pensou nun roteiro interpretativo pola nosa zona de proximidade”. Propoñen unha ruta guiada pola zona da ría de Foz, de 3 quilómetros de distancia e de dificultade baixa para o día 27 de maio, con saída ás 18:00 hoas da UNED. “Trátase de percorrer unha zona que xa coñecemos, pero observándoa baixo o prisma dun profesional que nos guiará no descubrimento”, explica a concelleira da Aula, que aproveita para “invitar a todas e todos a participar, xa que é unha actividade gratuíta, doada e moi interesante”. O responsable que vai guiar a ruta será Pedro Rolle, veciño do Valadouro e axente de medio ambiente. “É a persoa máis axeitada para guiar esta experiencia, conta cunha ampla experiencia como guía e é un especialista na flora da nosa zona”, subliña Muiña. Martínez Pena engade: “agardamos que esta sexa só a primeira das experiencias formativas que vivamos xunto a Rolle, xa que temos outras ideas en mente para levar a cabo no vindeiro curso”.
A maior parte destas actividades poden realizarse de maneira presencial e online, en directo e en diferido. Para obter máis información pódese contactar coa Aula Universitaria de Foz no teléfono 982.133.699, no WhatsApp 604.034.549 ou por correo electrónico foz@lugo.uned.es.
Elena Martínez adianta que “nos vindeiros meses seguiremos traballando para programar a oferta formativa do novo curso, unha oferta variada e dirixida a distintos públicos, atendendo sempre ás necesidades e os intereses mostrados”.
Dende a Coordinación, Muiña recorda que seguen inmersos no ciclo de presentacións da aula universitaria, xa tendo celebradas varias charlas informativas en Foz e en Burela, e invitan a que se soliciten, tanto na aula como no concello, estas sesións informativas por parte de quen teña interese en coñecer os servizos e recursos que dende UNED Foz se ofrecen.
Este luns, 14 de setembro, visitaron Mondoñedo, a Praia das Catedrais e Santa Cruz. A viaxe evocou as lecturas de Cunqueiro e as súas Crónicas do sochantre, nun percorrido que incluíu a catedral mindoniense e o barrio dos Muíños, ademais da emblemática praia de Augas Santas. Pola tarde participaron nunha exhibición de billarda grazas á estimable colaboración dos billardeiros da comarca. O martes partirán de regreso a Loktudi.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Este luns, 14 de setembro, deu comezo un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
A programación arrancará de 13:00 a 15:00 horas cos pinchos de benvida e unha sesión vermú a cargo do DJ Peabody. A continuación, de 15:00 a 17:00 horas, terá lugar a comida na Finca San Antonio, cun menú composto por salpicón de rape e langostinos, codillo con patacas, pan, postre, café, chupito e bebida incluída. Os tickets teñen un prezo de 40 euros e poden adquirirse en O Rincón, Confitería Alianza, Comercial Anjor e Perruquería Oriola; os menores de 5 anos asistirán de balde e os de 6 a 10 anos contan cun desconto do 50 %. Xa a partires das 18.30 horas haberá sesión de música con Toxo Guayaba.
