Presentadas as dúas novas audioguías ficcionadas de A Mariña: a de Morás, en Xove, e a de Burela

A Mariña, 18 de xuño de 2023. O Portiño de Morás, en Xove, acolleu esta tarde a presentación das dúas novas audioguías ficcionadas da Mancomunidade de Concellos da Mariña. Son as de Xove e Burela, que se unen ás outras sete xa estreadas hai tempo. No acto intervirona presidenta desta entidade e alcaldesa de Lourenzá, Rocío López, o alcalde de Xove, Demetrio Salgueiro, a alcaldesa de Burela, Carmela López, a xefa de área de Turismo de Galicia en Lugo, Paloma Vázquez, e Xesús Ron, de Chévere Teatro.

Trátase dun produto turístico que, coma noutros casos, se realizou co participación dos respectivos Concellos, responsables de Concellerías e dos seus técnicos, historiadores e veciños que axudaron a transmitir a historia de cada lugar a Chévere (Premio Nacional de Teatro, 2014), quen se encargou de darlles forma.

Un produto turístico que, nesta ocasión se desenvolveu ao abeiro do convenio que a Mancomunidade asinou o pasado ano con Turismo de Galicia, pero que noutras ocasións se ten promovido con convenios coa Deputación de Lugo ou a través do Plan de Sostibilidade Turística na Mariña.

No acto, que incluiu a realización dos paseos tanto en Xove coma en Burela, tamén participou o alcalde Foz e deputado de Recursos Sostibles, Francisco Cajoto, o Subdelegado accidental do Goberno en Lugo, Víctor Fraga Gayoso, os concelleiros de Turismo de Xove e de Burela, Cecilia Duarte e Ramiro Fernández, así coma un nutrido grupo de persoas de asociacións, centros educativos e hostalería dos dous concellos interesadas en coñecer esta nova oferta turística e cultural.

As audioguías ficcionadas da Mariña Lucense son unha iniciativa – pioneira en España – que aposta por mellorar a experiencia viaxeira das persoas que nos visitan a través dun produto de calidade, personalizado e adaptado a cada municipio onde se desenvolven, que axudan a divulgar e poñer en valor a historia local entre os propios residentes e a comunidade educativa. Son historias que ata o de agora estaban ambientadas en 7 localidades: Alfoz, Cervo, Foz, Lourenzá, Mondoñedo, Ribadeo e Viveiro e a partir de hoxe tamén o estarán en Morás, Xove, e Burela. Resultado dun coidado proceso de documentación por parte do equipo de Chévere, identifícanse sucesos, personaxes e lugares con nome propio que serven para transmitir a idiosincrasia e esencia de cada un dos municipios.

Son relatos ficcionados e dramatizados pola propia compañía que configuran un paseo ameno e suxerente con intervención de recursos documentais e literarios, mapas sonoros, dramatizacións, entrevistas, voces narradoras, música,… Cada audioguía ten un enfoque, un tratamento e un formato diferenciado que busca a implicación emocional por parte da persoa que escoita, provocar a curiosidade e promover que se fagan os diferentes paseos.

A presidenta da Mancomunidade, Rocío López, subliñou que “as audioguías ficcionadas propoñen un percorrido relaxado e sinxelo – en todos os casos de menos de 50 minutos – que se pode realizar individualmente, en parella ou en grupo. Poden reproducirse ou descargarse de forma gratuíta no dispositivo móbil, MP3 o MP4 de cada un dende a web da Mancomunidade e dos Concellos ou, nas oficinas de turismo locais– situadas sempre próximas ao lugar de inicio do percorrido – pódense alugar auriculares illantes coa audioguía incluída, con gratuidade para nenos e nenas de ata 12 anos e para outros colectivos concretos, coma no caso dos centros educativos”.

Para a presidente da Mancomunidade “as audioguías ficcionadas, son un piar máis dentro das distintas iniciativas que se desenvolven desde a Mancomunidade en colaboración directa cos Concellos en base ao turismo slow e sostible. Con elas agardamos poder ofrecer valor e atraer a un turista curioso, respectuoso e sensible co territorio a través de experiencias diferenciadoras, favorecer a súa permanencia e a desestacionalización, fortalecendo o posicionamento da Mariña Lucense como destino sostible e de calidade. As audioguías ficcionadas son un recurso complementario das visitas con guía e mesmo das visitas teatralizadas que permiten aos turistas, visitantes e á poboación local, sen cita previa e nos días que as oficinas de turismo están cerradas por descanso, vacacións, etc mergullarse na historia local”.

Na súa intervención a presidenta da Mancomunidade menciounou “co paseo audioguiado pola costa de Morás búscase desvelar as pegadas que deixou o pasado na sorprendente paisaxe deste recuncho da Mariña”e sobre Burela dixo que “trátase de rememorar a historia vital e mariñeira de Burela, reconstruíndo na mente da persoa que escoita a vida das súas xentes e a evolución da vila ata os nosos días”. López agradeceu “a participación dos Concellos de Xove e Burela, do seu alcalde e alcadesa, responsables de concellerías e dos seus técnicos, historiadores e veciños que axudaron a transmitir a historia de cada lugar a Chévere”.

Ao acto celebrado esta tarde en Morás, en Xove, e logo en Burela acudiron alcaldes e concelleiros da comarca da Mariña, propiestarios de establecementos hostaleiros, representantes das asociacións das vilas e dos centros educativos, que comentaron o interesante da iniciativa para introducir a historia local no seu alumnado.

Todo a información sobre as audioguías ficcionadas pode atoparse na páxina web da Mancomunidade de Concellos da Mariña Lucense: https://amarinalucense.gal/es/audioguias-ficcionadas