O BNG reclama á Xunta medidas para loitar contra as especies invasoras na costa galega

Rosana Pérez acusa o Goberno de Rueda de botar balóns fóra, criticar os concellos e acusar os medios de comunicación de alarmistas en lugar de facer algo

Santiago de Compostela,18 de marzo de 2025. A portavoz de Mar do BNG, Rosana Pérez, reclamou na comisión de Pesca deste martes a presentación por parte do Goberno galego de informes, de existiren, sobre a detección, incidencia, risco de expansión e consecuencias sobre a biodiversidade do medio mariño nas costas galegas especies invasoras como a alga asiática, o xacinto de auga ou o verme postenterogonia orbiculari —coñecido comunmente como planaria— e o pyura herdmani, que lle afectan aos bivalvos.

Fernández incidiu que estas especies constitúen unha ameaza máis para un sector ao que a Xunta condena coa súa intención de implantar Altri no corazón de Galiza. “Diante desta situación que ninguén entendería nun país que tivese un Goberno que traballase para o propio País e a súa xente, e non para a instalación de macrocelulosas como a de Altri e explotacións mineiras como a de Touro ou a de San Finx, temos agora un problema que cada vez medra máis e que tampouco é novo”, lamentou.

Asegurou descoñecer se a Xunta está a intensificar os controis e a realizar un seguimento desas especies, tal e como vén de esixir tamén o secretario do Consello Regulador da DOP Mexillón de Galiza, quen lle reclamou responsabilidade á Xunta de Galiza e manter a vixilancia. “Parécenos ben que a Consellería lle pida calma ao sector, pero alén diso, que están a facer?” preguntou a deputada, acusando o PP de levar máis de 16 anos sen facer nada pola perda de produtividade das rías galegas, “o noso petróleo”, poñendo “trabas e obstáculos” para a súa recuperación.

Afirmou, que “se o Goberno galego defendese e que valorase o que significa o sector para Galiza non estaría botando balóns fóra, tachando aos grupos políticos e aos medios de comunicación de alarmistas ou criticando os concellos e esixíndolles que se encarguen eles de xestionar o problema. Hoxe o PP deu novamente as costas ao sector botando en contra da iniciativa do BNG.

Unha iniciativa que pedía ademais que se activen as medidas de alerta necesarias que eviten o establecemento, a mobilidade e a dispersión desas especies para así minimizar os posíbeis riscos, sendo conscientes de que en Galiza existen máis de 3.000 bateas de mexillón . “Calma si pero sen pausa”, pediu Pérez, instando a “poñer todos os medios para tratar de que o mal non vaia a maiores”, e lembrando que, tal e como sostén a comunidade científica, a previsión e detección temperá son cruciais para evitar problemas máis serios.

Propuxo ademais que o establecemento de directrices claras a respecto da xestión, do control e da posíbel erradicación destas especies invasoras, e non ”confusión e demoras nas actuacións”, aclarou, subliñando que a Xunta non debe escatimar medidas de ningún tipo, tampouco en materia orzamentaria, porque o dano pode ser importante e porque xa o está a ser nalgúns casos como o do xacinto de auga”. “Débense dedicar todos os esforzos a investigar, detectar, vixiar e mitigar a expansión”, recalcou.

As especies que ameazan a un sector xa agonizante

As propostas do BNG xorden da base dos riscos que representan estas especies invasoras nas costas galegas, e tamén da situación de partida na que está o sector, dunha perda de produtividade histórica —incluído o mexillón—, e dunha perda de facturación e de postos de traballo moi alta. “A Consellería non pode tomar este tipo de perigos con calma, senón todo o contrario.”, apremiou.

A deputada nacionalista incidiu na importancia destas medidas despois de que a principios do pasado mes de decembro se soubo da presencia na costa asturiana, e por primeira vez en Europa, dunha especie orixinaria do océano Pacífico, a postenterogonia orbicularis, un verme invasor que se alimenta de bivalvos e que pon en risco os ecosistemas mariños e que en febreiro deste ano xa se atopou na ría de Ribadeo. Pérez recriminou que estes días a Xunta do PP volvese relativizar o risco e acusase os medios de comunicación de “alarmistas”.

Así mesmo, a primeiros deste mesmo ano, coñeceuse a presenza na boca da ría de Arousa de exemplares de pyura herdmani, que tamén afecta ao mexillón, aínda que ao non está a supoñer un problema polo de agora, aclarou.

Por outro lado, xa hai meses que se sabe da existencia da chamada alga asiática en augas galegas, primeiro nas rías da Coruña e Vigo e máis tarde na de Arousa, outra agresiva especie xa incluída no Catálogo de Especies Exóticas Invasoras dende o ano 2020 e que xa vén causando dende hai anos danos no sur da península.

Por último, segundo sinalou Pérez, tamén nesta zona veñen loitando dende hai anos contra o xacinto de auga, unha das plantas invasoras máis perigosas que se coñecen e que xa invade determinadas zonas de Galiza dende o 2010, nomeadamente a lagoa de Rouxique, en Sanxenxo, integrada no complexo intermareal Umia-O Grove eu que tamén foi localizada posteriormente na Lanzada, Vigo, Culleredo ou a costa do Barbanza.