O BNG de Viveiro solicita a convocatoria dunha comisión de traballo para actualizar a ordenanza do servizo de taxi

Viveiro, 11 de maio, 2025. O Bloque Nacionalista Galego de Viveiro insta ao goberno municipal a convocar con urxencia unha comisión de traballo para a actualización da ordenanza que regula o servizo de taxi no concello. A actual normativa, aprobada no ano 2016, resulta obsoleta e non garante a cobertura adecuada dun servizo esencial para a veciñanza.

Segundo sinala a voceira do BNG, Míriam Bermúdez, “son moitas as queixas que estamos a recibir por parte da veciñanza, especialmente en relación coa inexistencia do servizo en horario nocturno ou coa ausencia de taxis en determinadas paradas establecidas pola propia ordenanza”.

Bermúdez lembra que na pasada sesión plenaria revisáronse as tarifas aplicables para o ano 2025, “pero resulta incongruente abordar só a parte económica cando o servizo, tal e como está regulado, presenta eivas importantes que afectan directamente á atención á cidadanía”.

A normativa vixente establece no seu artigo 26 que o servizo debe prestarse as 24 horas do día mediante un sistema de quendas de traballo, que deben presentarse antes do 15 de decembro. “Na práctica, isto non se está a cumprir, polo que urxe revisar e consensuar co sector unha ordenanza actualizada que permita garantir un servizo continuo e axeitado”, afirma Bermúdez.

A voceira nacionalista tamén pon o foco na situación de varias paradas de taxi recollidas na norma, como a situada na Rúa do Porto de Celeiro, actualmente afectada por obras e sen previsión de uso, ou a da Avenida de Cantarrá, “un espazo que nunca chegou a utilizarse como parada de taxi e que resta prazas de aparcamento nunha zona de alta demanda”.

Por todo isto, o BNG solicita:

A convocatoria dunha comisión de traballo para a modificación da ordenanza de taxis.

-Que se tramite a solicitude da quenda de servizo correspondente á anualidade 2025, garantindo a prestación do servizo 24 horas.
-Que se faciliten os datos relativos ao número de licenzas máximas permitidas no concello e as licenzas actualmente vixentes/en activo.
-“O servizo de taxi non é un luxo, senón un servizo público básico que debe estar ao servizo da veciñanza, tamén en horario nocturno e nas parroquias”, conclúe Bermúdez.