Tomé comproba en Abadín e Vilalba as melloras na estrada LU-P-0106, executadas cun investimento de preto de 200.000€

Tomé Roca supervisou xunto á Alcaldesa vilalbesa, Marta Rouco, e a concelleiros e concelleiras de ambos municipios, as obras executadas en case 4 quilómetros desta vía provincial que conecta as parroquias de Corvite e Corvelle

Lugo, 19 de xullo de 2025. O Presidente da Deputación de Lugo, José Tomé Roca, desprazouse aos concellos de Vilalba e Abadín para comprobar xunto coa Alcaldesa de Vilalba, Marta Rouco, e con concelleiros de ambos municipios, o resultado das obras de mellora executadas na estrada provincial LU-P-0106, que conecta Corvite, na estrada autonómica LU-113, con Martiñán, na estrada nacional N-634. A intervención contou cun orzamento de adxudicación de case 200.000€ e permitiu acondicionar case 4 quilómetros dunha vía que é estratéxica para a mobilidade e o desenvolvemento da comarca chairega.

Tomé Roca destacou que a actuación se centrou en dous treitos concretos da vía: desde o seu inicio ata o punto quilométrico 0,687 e desde o quilómetro 2,920 ata o 6,043. Os traballos realizados incluíron a reapertura de cunetas para unha mellor drenaxe, a pavimentación da calzada con aglomerado en quente para mellorar a seguridade e a comodidade na condución, e a renovación da sinalización horizontal mediante marcas reflexivas brancas que incrementan a visibilidade e a seguridade viaria, especialmente en condicións adversas.

O Presidente fixo fincapé en que esta obra representa unha mellora importante nas comunicacións entre os concellos de Abadín e Vilalba, xa que a estrada LU-P-0106 conecta a LU-113, que vai de Rozas a Abadín, coa estrada nacional N-634, unha das principais vías de comunicación do norte da provincia. A súa mellora facilita o tránsito diario de vehículos e persoas, tanto en desprazamentos particulares como profesionais, e contribúe á vertebración territorial da provincia.

Ademais do seu uso funcional, a estrada LU-P-0106 ofrece acceso a puntos de interese turístico, natural e patrimonial, como a Ruta dos Muíños, a Igrexa de San Pedro de Aldixe ou as parroquias de Corvite, en Abadín, e Corvelle, en Vilalba, que agora quedan mellor conectadas.

Este proxecto enmarcase dentro do compromiso da Deputación de Lugo coa mellora da rede viaria provincial, que supera os 4.200 quilómetros de extensión, como unha ferramenta esencial para garantir a igualdade de oportunidades no territorio, facilitar o acceso a servizos básicos e contribuír a fixar poboación no rural.