O BNG reclama as competencias de Salvamento “para dar a Galiza un servizo propio, máis eficaz e adaptado á súa costa”

Rosana Pérez, tras o voto en contra do PP: “Levan 16 anos sendo o verdadeiro motor e o verdadeiro cómplice da discriminación a Galiza”

Santiago de Compostela, 21 de outubro, 2025. A portavoz de Pesca do BNG no Parlamento, Rosana Pérez, defendeu no Pleno unha proposición de lei para reclamar ao Estado a transferencia a Galiza das competencias de Salvamento Marítimo e loita contra a contaminación mariña, que lle permitan ter un dispositivo propio, máis eficaz e adaptado á súa realidade.

“Queremos un modelo de salvamento de titularidade galega que teña capacidade de resposta inmediata, un servizo público, universal e gratuíto que deixa atrás ese modelo economicista que condiciona ata o extremo o salvamento, un servizo dotado de xeito acaído e coordinado co resto dos servizo do Estado, de Portugal e do resto de Europa”, sintetizou a deputada nacionalista, que lamentou, máis unha vez, que o PP, co seu voto en contra, actúe como muro de contención contra o autogoberno de Galiza.

“O Partido Popular leva 16 anos acatando submiso unha estratexia recentralizadora nefasta para Galiza” e “sendo o verdadeiro motor e o verdadeiro cómplice da discriminación do noso País Galiza”, sostivo Rosana Pérez, que lembrou que a de hoxe foi a quinta vez desde o 2009 que o BNG levou ao Parlamento galego a reclamación das competencias de Salvamento e Contaminación Marítima, que xa conseguiu Euskadi “malia ter a costa infinitamente menos que a nosa”.

“Por que agora non é fulcral para o PP que non haxa discriminación cando se nalgún lugar ten sentido que se reclamen as competencias de Salvamento é en Galiza?”, preguntou.

Ao longo da súa intervención, a portavoz de Pesca debullou as “razóns de peso” que xustifican a iniciativa do BNG, como o feito de termos a taxa de sinistralidade no mar máis alta de toda Europa, sermos un “un dos puntos do Planeta máis agredido como consecuencia do impacto de mareas negras” e ter unha costa que “pouco ou nada ten que ver coa do resto da Península”. Polo corredor de Fisterra, remarcou, circulan cada ano 12.000 buques con materias perigosas.

Tras recordar algunha das maiores catástrofes rexistradas na costa galega, como a do Prestige, o Mar Egeo, o Casón ou o Urguiola, a deputada do BNG referiuse tamén a todas as vidas que se perderon no mar ou aos máis de 100 buques afundidos no que vai de século. Ningún outro territorio, subliñou, ten preto de 4.000 embarcacións, en