López Campos aborda coa alcaldesa de Viveiro as vantaxes da modificación da Lei de Patrimonio Cultural para axilizar trámites e reducir esperas

Santiago de Compostela, 12 de xaneiro de 2026. O conselleiro de Cultura, Lingua e Xuventude, José López Campos, mantivo hoxe unha xuntanza coa alcaldesa de Viveiro, Mariña Gueimude, na que abordou as vantaxes que a adaptación da Lei do Patrimonio Cultural permitirá a este municipio, así como aos do resto da Comunidade, para axilizar trámites e garantir unha protección máis eficaz dos bens patrimoniais. Ademais, tamén afondou coa rexedora sobre cuestións vencelladas co seu departamento, que resultan relevantes para este concello da Mariña lucense, como a mellora de infraestruturas culturais.

Neste senso, o representante da Xunta explicoulle que as modificacións previstas na Lei de acompañamento dos Orzamentos para a Lei 5/2016 do Patrimonio Cultural de Galicia permitirán reducir os tempos de espera, tanto por parte da cidadanía como das institucións, co obxectivo de que o coidado do patrimonio non supoña un impedimento para o desenvolvemento de proxectos vitais ou profesionais. Neste senso, cómpre subliñar que, na actualidade, a Xunta de Galicia é a única administración autonómica que actualmente informa dos bens de todo o territorio con independencia de cal sexa o seu grado de protección, o que supón a xestión cada ano de 30.000 expedientes cun prazo de resolución aproximado de entre seis e 12 meses.