A Xunta reivindica a variante leste como a solución clave para a mobilidade de Viveiro

A solución elixida é a de menor impacto ambiental e posibilita unha mellor articulación territorial dos núcleos de Viveiro, Covas e Celeiro

Lugo, 1 de febreiro de 2026. O delegado territorial da Xunta, Javier Arias, defendeu esta mañá a proposta da Xunta para a variante leste de Viveiro como unha actuación “realista, rigorosamente planificada e pensada para dar resposta ás necesidades actuais de mobilidade do municipio”, fronte ás críticas vertidas polo PSOE. Segundo Arias, a infraestrutura suporá “unha mellora significativa da mobilidade na contorna, reducirá os tempos de percorrido e incrementará a seguridade viaria, ao igual que o estamos a facer xa na mellora da LU-540, que enlaza esta localidade co resto da provincia, cun investimento de 8,2M€.

Arias subliñou que a Xunta traballa cun proxecto viable técnica e ambientalmente, cun investimento estimado de 38 millóns de euros, e avanzou que o Executivo autonómico prevé licitar no primeiro trimestre deste ano o proxecto de construción da infraestrutura. “Falamos dunha proposta seria, baseada en criterios técnicos e no diálogo, que busca mellorar as comunicacións nunha zona importante da provincia, con solucións executables e non con anuncios baleiros, como fai o Goberno central coa A-74 ao tempo que ten a súa rede de estradas chea de fochancas”, sinalou.

O delegado explicou que a alternativa escollida é a de menor impacto ambiental e permite unha mellor articulación territorial entre os núcleos de Viveiro, Covas e Celeiro. Neste sentido, destacou que a nova variante permitirá liberar o casco urbano de arredor dun 60% do tráfico, especialmente do transporte pesado, ao absorber os desprazamentos de longo percorrido e parte do tránsito local.

Ademais, puxo en valor que a actuación optimizará a conexión co porto de Celeiro, reforzando a competitividade económica da zona e contribuíndo ao desenvolvemento do tecido produtivo vinculado á actividade portuaria e pesqueira.

Segundo Arias, a infraestrutura suporá unha mellora significativa da mobilidade na contorna, reducirá os tempos de percorrido e incrementará a seguridade viaria. “A Xunta aposta por solucións útiles para a veciñanza, que combinan desenvolvemento, seguridade e respecto polo medio ambiente”, afirmou.

O delegado territorial insistiu en que o Goberno galego mantén o seu compromiso con Viveiro e coa Mariña lucense a través de proxectos planificados, con financiamento garantido e calendario definido, “fronte a polémicas estériles que non achegan solucións aos problemas reais da cidadanía”.