Pedro Blanco recoñece o novo impulso da presidenta, Carmela López, e garante que a Delegación do Goberno será unha aliada constante para seguir impulsando proxectos e oportunidades para Lugo
Lugo, 10 de febreiro de 2026.- O delegado do Goberno en Galicia, Pedro Blanco, destacou hoxe que “Lugo vive o seu mellor momento grazas ao compromiso sostido do Goberno de Pedro Sánchez”. Fíxoo logo dunha reunión de traballo coa presidenta da Deputación de Lugo, Carmela López, na que tamén participo a subdelegada do Goberno, Olimpia López. O delegado puxo en valor os máis de 1.400 millóns de euros en investimentos que o Goberno leva mobilizados na provincia nos últimos anos, con actuacións en infraestruturas, industria, vivenda, servizos públicos e cohesión territorial. “Estamos en cada concello, en cada parroquia, en cada comarca”, afirmou.
Así, destacou que “en tempos de ruído e confrontación interesada, a colaboración institucional é máis necesaria ca nunca”, subliñando que o encontro serviu para poñer o foco no rural, no reto demográfico e nas necesidades reais dunha provincia extensa e profundamente rural como Lugo. “Falamos de proxectos, si, pero sobre todo falamos de persoas, de concellos pequenos, de comarcas e de como garantir futuro e oportunidades vivas onde vivas”, asegurou o delegado, que reafirmou que “non hai cohesión territorial sen rural vivo, e non hai futuro para Lugo sen mellores infraestruturas, máis industria e un Estado do Benestar forte”.
Mellores infraestruturas
Nesta liña, Pedro Blanco puxo en valor os máis de 650 millóns de euros investidos en infraestruturas ferroviarias, co impulso da estación intermodal de Lugo, a modernización da liña con Ourense e a eliminación de pasos a nivel. “Nunca se fixo un esforzo tan grande polo ferrocarril que merecen os lucenses”, lembrou.
Tamén subliñou o esforzo en materia de infraestruturas viarias con especial mención á próxima finalización do último tramo da autovía Lugo–Santiago, que permitirá conectar ambas cidades en 50 minutos e vertebrar a Galicia interior. Desde a chegada de Pedro Sánchez, lembrou, púxose en servizo a metade desta infraestrutura, “un símbolo do paso do abandono ao compromiso”. Ademais, avanzou que o Goberno continuará mellorando a A-6, a A-8, a conexión con Ourense e a autovía da Mariña, xunto cun forte impulso á conservación da rede viaria, cun investimento de máis de 170 millóns de euros na provincia.
Unha industria máis forte
Pedro Blanco incidiu tamén no impacto do Plan de Recuperación na provincia, onde mobiliza 150 millóns, nunha gran parte dirixidos á reindustrialización de Lugo, con axudas directas a proxectos solventes, innovadores e axustados ás necesidades reais da industria. No marco destes fondos están programas como o Kit Dixital, que chegou xa a 25.000 pemes e autónomos da provincia.
Tanto o delegado como a presidenta da Deputación coincidiron en reclamar máis implicación por parte da Xunta de Galicia nesta materia, lembrando que a industria é competencia autonómica e Lugo necesita un goberno galego que crea no seu potencial e o impulse con decisión. Pola contra, o delegado destacou o papel da Deputación no despregamento de fondos europeos a través de iniciativas como o Centro de Innovación Territorial ou o Reto Rural Dixital.
Abordaron tamén as demandas do sector primario, piar económico e social de Lugo no que o Goberno inxectou máis de 40 millóns de euros nos últimos anos só en axudas extraordinarias, porque “o sector lácteo, o cárnico e o pesqueiro, con portos de referencia como o de Burela e Celeiro, saben que este Goberno está e vai seguir estando ao seu lado”.
Maior benestar e máis emprego
O delegado do Goberno puxo en valor o escudo social impulsado polo Goberno de Pedro Sánchez, que beneficia a máis de 113.000 pensionistas en Lugo que se benefician dunha suba media de 400 euros anuais desde 2018 na súa pensión. Subliñou tamén o impacto do Ingreso Mínimo Vital, que chega a máis de 6.000 fogares e da reforma laboral, que permitiu superar os 26.000 contratos indefinidos na provincia.
O delegado tamén puxo o foco no acceso á vivenda, sinalando que o prezo do alugueiro en Lugo medrou case o triplo que os salarios na última década e “non o podemos permitir”. Así, salientou que o Goberno está a despregar un financiamento récord para rehabilitación, vivenda pública, alugueiros asequibles e apoio ao rural e á mocidade e lembrou que xa se transferiron máis de 530 millóns de euros á Xunta, cos que se financian boa parte dos programas anunciados polo goberno galego.
O delegado tamén destacou o compromiso co turismo sustentable, con investimentos en destinos e infraestruturas como os paradores de Monforte e Vilalba. Reivindicou, ademais, a candidatura da Ribeira Sacra como Patrimonio da Humanidade como “un fito de país no que estamos a poñer todo o empeño desde o Goberno”.
Pedro Blanco agradeceu, por último, a Carmela López “o seu compromiso co territorio e o seu liderado” e asegurou que a Delegación do Goberno será unha aliada constante para seguir impulsando proxectos e oportunidades para Lugo. “Lugo non espera o seu momento, vive o seu mellor momento, e imos traballar xuntos para que siga sendo así”, concluíu.
O Concello destaca que este novo éxito é froito do compromiso, do esforzo e da dedicación constante do deportista, cualidades que lle permiten seguir acadando resultados destacados a nivel estatal. Desde a entidade municipal transmítense os parabéns a González Villares por este subcampionato de España.
A proba, organizada polo CP Altrúan, reuniu máis de 130 palistas dos seis clubs lucenses de augas tranquilas que participan na competición: o propio Altruán, o CD San Ciprián, o Club Kayak Foz, o CP Viveiro Urban Hotel, o Cidade de Lugo e o Club Fluvial de Lugo. O deputado de Mocidade Daniel García entregou os premios da proba, na que Club Fluvial de Lugo, Cidade de Lugo e Altruán coparon o podio por equipos. A Copa Deputación de Piraguismo, que conta de 6 regatas, organízase no marco da colaboración que a Vicepresidencia da Deputación de Lugo mantén coa Federación Galega de Piragüismo para a promoción deste deporte, ofrecendo aos clubs a posibilidade de participar en competicións federadas nas súas comarcas e contribuíndo así á consolidación de equipos de base.
Malia a intensa calor, o pavillón encheuse de público para gozar das actuacións das numerosas alumnas, que ofreceron exercicios individuais, por parellas e en grupo, destacando pola súa beleza e dificultade técnica ao ritmo da música escollida. Ao remate, a concelleira Ana Rubal entregou medallas ás participantes, que tamén agradeceron o traballo e os valores transmitidos pola súa monitora, Lorena Fernández. Lémbrase que a festa de clausura das Escolas Deportivas terá lugar o luns 29 ás 19:00 horas, nun acto conxunto co Concello de Alfoz, no que haberá diversas actividades de celebración e a entrega de diplomas.
A cantante e instrumentista asturiana Mónica Acevedo actuará en formato solista, mentres que o equipo do local ofrecerá un menú especial con pratos como o tartar de xarda, gañador do “Ribadeo Sabe”, gazpachuelo de tempada, lomo de sardiña con berenxena afumada, cóctel de lagostinos, bonito de Burela con melocotón asado e sopa de cebola, e solombo de porco celta con xudías tenras. A cita comeza ás 21:15, con prazas limitadas e reserva imprescindible.
A xornada incluíu tamén o IV Torneo de Pádel, que continuará durante a fin de semana. O evento, organizado polo Concello xunto con ASAPA e Miño Vivo e coa colaboración da Xunta, recupera unha iniciativa nacida hai catro anos a petición da mocidade, coa intención de consolidala no tempo. O tenente de alcalde, Marcos García Lombardero, destacou a alta participación —catro veces maior ca na primeira edición— e agradeceu a implicación de entidades, colaboradores e asistentes, así como a presenza de representantes da Xunta, do Parlamento e da Deputación.
Adultos, nenos, familias, grupos de amizades fixeron o percorrido nun día espectacular de sol e cunha temperatura de 26º á hora da saída. Acudiron á cita o presidente provincial da AECC, José Manuel Rozas, o alcalde de Ribadeo, Dani Vega, as concelleiras e concelleiro ribadenses, Marta Saiz, Begoña Sanjurjo, Elena Sierra e Francisco José Silvent, a presidenta e o xerente de Acisa, Carmen Cruzado e Jesús Pérez, así como representantes da AECC de Ribadeo coa súa presidenta, Tea Martínez, á cabeza. A II Andaina Ribadeo en marcha contra o cancro contou co patrocinio de Solán e Acisa Ribadeo e coa colaboración do Concello de Ribadeo, Eroski e 2M.
Foi unha xornada máxica na que a música e a convivencia se deron a man nunha contorna única. Os instrumentos de corda encheron de melodías os xardíns do centro, creando unha atmosfera especial que emocionou ao público asistente e puxo en valor o talento e a ilusión da mocidade. A alcaldesa de Cervo, Dolores García Caramés, non quixo perderse esta cita tan especial e desfrutou da tarde xunto ás persoas usuarias, e o persoal do centro. Durante o encontro, agradeceu o convite e felicitou á organización por promover actividades que fomentan a cultura, a inclusión e os espazos de encontro entre a veciñanza.
